इरानमाथि नयाँ आक्रमणको तयारीमा अमेरिका, तेहरानले दियो कडा प्रतिकारको चेतावनी

एजेन्सी । अमेरिकाले मध्यावधि निर्वाचनपछि इरानमाथि पुनः सैन्य आक्रमण गर्ने विकल्पबारे तयारी गरिरहेको विवरण सार्वजनिक भइरहेका बेला इरानले कुनै पनि आक्रमणको कडा जवाफ दिने चेतावनी दिएको छ। सम्भावित सैन्य कारबाहीलाई लिएर अमेरिका र इजरायलको तयारी तथा इरानको प्रतिक्रियाले पश्चिम एसियामा तनाव थप बढ्ने चिन्ता उत्पन्न भएको छ।

द न्युयोर्क टाइम्सको रिपोर्टअनुसार अमेरिका र इजरायलले इरानका ऊर्जा पूर्वाधार, आणविक केन्द्र तथा क्षेप्यास्त्र र ड्रोन भण्डारणस्थललाई लक्षित गरी छोटो अवधिको तीव्र सैन्य कारबाहीको योजना बनाइरहेका छन्। यद्यपि, अमेरिकी राष्ट्रपति डोनाल्ड ट्रम्पले उक्त योजनालाई अन्तिम स्वीकृति दिने वा नदिने भन्ने विषय अझै स्पष्ट भएको छैन।

इरानी रिभोलुसनरी गार्ड कर्प्सका प्रवक्ता हुसेन मोहेबीले अमेरिकाको सम्भावित आक्रमणको जवाफमा आफ्नो देशले शक्तिशाली प्रतिकार गर्ने बताएका छन्। अमेरिकासँग ‘सबै बमकी आमा’ भनिने शक्तिशाली बम रहेको उल्लेख गर्दै उनले इरानले त्यसको जवाफमा ‘सबै बमका पिता’ देखाउने चेतावनी दिएका हुन्। तर, इरानले आफूले प्रयोग गर्न सक्ने भनिएको हतियारको प्रकृति र क्षमताबारे विस्तृत जानकारी दिएको छैन।

अमेरिकाले इरानको भूमिगत पिक्याक्स माउन्टेन आणविक केन्द्रलाई लक्षित गर्न २२ हजार पाउन्ड तौलको एमओएबी बम प्रयोग गर्ने विकल्पबारे विचार गरिरहेको भन्ने विवरणपछि इरानको चेतावनी आएको हो। तर, विज्ञहरूले उक्त बमले ग्रेनाइट चट्टानभित्र रहेको भूमिगत आणविक केन्द्रलाई पूर्ण रूपमा नष्ट गर्न सक्ने क्षमताबारे प्रश्न उठाएका छन्।

यसैबीच, अमेरिकाले नोभेम्बरको सुरुसम्ममा तीनवटा विमानवाहक युद्धपोत, हजारौँ नौसैनिक, लडाकु विमान तथा विशेष सैन्य बलसहित ठूलो सैन्य शक्ति तयारी अवस्थामा राख्ने योजना बनाएको रिपोर्टमा उल्लेख छ।

इरानी राष्ट्रपति मसुद पेजेस्कियानले भने बाह्य दबाब र युद्धको सम्भावनाका बाबजुद इरान दृढ रहने बताएका छन्। इरानले सम्भावित सैन्य द्वन्द्वको असर परम्परागत सैन्य संरचनामा मात्रै सीमित नहुने चेतावनीसमेत दिएको छ।

इरानी अधिकारीहरूका अनुसार द्वन्द्व चर्किए ऊर्जा पूर्वाधार र व्यावसायिक ढुवानीका अतिरिक्त डाटा केन्द्र तथा समुद्रमुनि बिछ्याइएका इन्टरनेट केबलसमेत प्रभावित हुन सक्छन्। यस्तो अवस्थाले क्षेत्रीय सुरक्षासँगै अन्तर्राष्ट्रिय सञ्चार र ऊर्जा आपूर्तिमा समेत असर पार्न सक्ने चिन्ता बढाएको छ।

रिपोर्टअनुसार अमेरिकी योजनाका केही पक्षले तीन दिनको तीव्र आक्रमणले इरानलाई वार्तामा थप सहुलियत दिन बाध्य पार्न सक्ने आकलन गरेका छन्। तर, यसअघि भएका अमेरिका–इजरायलका आक्रमणले ऊर्जा मूल्य र मुद्रास्फीति बढाउनुका साथै क्षेत्रीय सुरक्षा चुनौती थप जटिल बनाएको उल्लेख गरिएको छ।

अमेरिका र इजरायलको सैन्य तयारी तथा कूटनीतिक प्रयास जारी रहेका बेला ट्रम्पको अन्तिम निर्णय र इरानले चाल्ने सम्भावित कदमबारे अन्योल कायमै छ। यदि नयाँ सैन्य आक्रमण सुरु भए त्यसले पश्चिम एसियामा द्वन्द्व विस्तार गर्नुका साथै विश्वव्यापी ऊर्जा बजार, व्यापार र क्षेत्रीय स्थिरतामा समेत असर पार्न सक्ने चिन्ता व्यक्त गरिएको छ।