सुनसरीमा गाँजा र प्रतिबन्धित औषधिसहित चार जना पक्राउ

इनरुवा । सुनसरीमा प्रहरीले गाँजा र प्रतिबन्धित औषधिसहित चार जनालाई पक्राउ गरेको छ । देवानगन्ज गाउँपालिकाबाट गाँजा तथा कोशी गाउँपालिकाबाट ट्रामाडोल र नाइट्राजेपाम औषधिसहित उनीहरू पक्राउ परेका हुन् ।

प्रहरीका अनुसार मंगलबार साँझ देवानगन्ज गाउँपालिका–२ स्थित देवानगन्ज–घुस्की भित्री सडकखण्डमा चेकजाँचका क्रममा १३ किलो ५२० ग्राम गाँजा बरामद गरिएको हो । देवानगन्जबाट घुस्कीतर्फ जाँदै गरेको प्रदेश १–०२–०४६ प १७४३ नम्बरको मोटरसाइकल रोकेर चेकजाँच गर्दा लुकाइछिपाइ ल्याइएको अवस्थामा गाँजा बरामद भएको सुनसरी प्रहरीका सूचना अधिकारी डीएसपी चन्द्रबहादुर खड्काले बताए ।

प्रहरीले मोटरसाइकल चालक हरिनगर गाउँपालिका–६ का २६ वर्षीय लुकमान अन्सारी र पछाडि सवार भारतको पूर्णिया जिल्ला राजदमपुर पञ्चायत–९ का २८ वर्षीय एमली मझाललाई पक्राउ गरेको छ । उनीहरूलाई गाँजा र मोटरसाइकलसहित नियन्त्रणमा लिएर जिल्ला प्रहरी कार्यालय सुनसरीमा राखिएको डीएसपी खड्काले बताए ।

यसैगरी, मंगलबार साँझ कोशी गाउँपालिका–१ लौकहीस्थित पूर्व–पश्चिम राजमार्गमा लागुऔषधजन्य औषधिसहित दुई जना पक्राउ परेका छन् । पश्चिमबाट पूर्वतर्फ पैदल आउँदै गरेका उदयपुरको चौदण्डीगढी नगरपालिका–९ का २६ वर्षीय लालबहादुर श्रेष्ठ र सुनसरीको बराहक्षेत्र नगरपालिका–७ का २४ वर्षीय निर्मल श्रेष्ठलाई शंकाका आधारमा चेकजाँच गर्दा उनीहरूको साथबाट ट्रामाडोल १ हजार २६० क्याप्सुल र नाइट्राजेपामका ४० ट्याब्लेट फेला परेको प्रहरीले जनाएको छ ।

दुवै घटनामा पक्राउ परेका चारै जनामाथि आवश्यक अनुसन्धान भइरहेको प्रहरीले जनाएको छ । पक्राउ परेकाविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।