पहाडी क्षेत्रमा हल्का वर्षाको सम्भावना, तराईमा मौसम सफा रहने

Share this
705shares
मुलुकी खबर
मुलुकी खबर
clock२०८३ कात्तिक १७, मंगलबार ०६:३०

काठमाडौं । देशका अधिकांश स्थानमा आज (मंगलबार) मौसम सामान्यतया सफा रहने भए पनि केही पहाडी क्षेत्रमा हल्का वर्षा हुन सक्ने पूर्वानुमान गरिएको छ ।

मौसम पूर्वानुमान महाशाखाका अनुसार पश्चिमी वायु र भारतको उत्तर प्रदेशमा विकसित न्यूनचापीय क्षेत्रको आंशिक प्रभाव नेपालमा परेको छ । त्यसको प्रभावले बिहान देशका विभिन्न पहाडी तथा तराई क्षेत्रसँगै उपत्यका र खोँचहरूमा हुस्सु तथा कुहिरो लागेको छ ।

महाशाखाले दिउँसो हिमाली र पहाडी क्षेत्रमा आंशिक बदली रहने जनाएको छ । तराईका जिल्लामा भने मौसम मुख्यतया सफा रहने अनुमान छ । कोशी, बागमती, गण्डकी र लुम्बिनी प्रदेशका पहाडी क्षेत्रका एकदुई स्थानमा हल्का वर्षा हुन सक्ने सम्भावना छ ।

यस्तै, राति हिमाली क्षेत्रमा आंशिक बादल लाग्ने भए पनि पहाडी र तराई क्षेत्रमा मौसम प्रायः सफा रहनेछ । तराई, उपत्यका र खोँचका केही स्थानमा बुधबार बिहान पनि हुस्सु तथा कुहिरो लाग्न सक्ने महाशाखाको अनुमान छ ।

महाशाखाले मौसममा हुन सक्ने परिवर्तनबारे जानकारी राख्न र नियमित रूपमा मौसम पूर्वानुमान हेर्न सर्वसाधारणलाई आग्रह गरेको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.