कोशी अस्पताल आएका मन्त्रीलाई सेवाग्राहीले घेरे

विराटनगर । विराटनगरको कोशी अस्पताल निरीक्षणका लागि आएका स्वास्थ्य तथा जनसङ्ख्या मन्त्री प्रदीप
पौडेललाई सेवाग्राहीले घेरेका छन् । बिहीबार अस्पताल निरीक्षणका लागि आएका मन्त्री पौडेललाई बिरामीहरूले घेरेका हुन् ।

अस्पतालमा सेवाका लागि लाइनमा बसिरहेका बिरामीले मन्त्री पौडेलसँग गुणस्तरीय सेवा पाउन कठिन भएको र  सेवा पाउन पनि गाह्रो भएको गुनासो गरे ।  मन्त्री पौडेललाई घेरेर सेवाग्राहीले ‘किन आउनु भएको, जनताको पीर मर्का कहिल्यै बुझ्नुहुन्छ ?’ भनेर प्रश्न गरेका थिए । उनीहरूले अस्पतालको सेवा सुधारको माग गरे ।

अस्पतालको निरीक्षण पछि मन्त्री पौडेलले अस्पतालको अवस्था भद्रगोल रहेको बताए । ओपीडीमा भीड रहेको, सेवाग्राहीलाई सेवा लिन समस्या रहेको भन्दै सेवाग्राहीको आवश्यकता अनुसार व्यवस्थापन गर्न निर्देशन दिए ।

उनले अनलाइन प्रणालीमा गएर सेवालाई प्रभावकारी र व्यवस्था गर्न निर्देशन दिए । अनलाइनमार्फत सेवा लिने थोरै हुन्छन् भनेर सेवा नै सुरु गर्न ढिलाई गर्न नहुने भन्दै उनले अनलाइनमार्फत रजिष्ट्रेशन, पेइङ र रिपोर्ट अनलाइन माध्यमबाट नै सुरु गरे सेवा प्रभावकारी, छिटो र छरितो हुने बताए ।

स्वास्थ्य तथा जनसङ्ख्या मन्त्रालयका सचिव डाक्टर रोशन पोखरेलले कोशी अस्पताललाई मागी खाने भाँडो नबनाउन आग्रह गरे । उनले अनावश्यक रुपमा डाक्टर नियुक्त नगर्न पनि आग्रह गरे ।