
विराटनगर । नेकपा (माओवादी केन्द्र) संसदीय दलका नेता इन्द्रबहादुर आङ्बोले रचनात्मक प्रतिपक्षको भूमिका निर्वाह गर्ने बताएका छन् ।
संसदमा शुक्रबार विशेष समय लिएर बोल्दै उनले माओवादी प्रदेशमा रचनात्मक प्रतिपक्षमा रहने बताए । सत्तारुढ नेपाली कांग्रेस र नेकपा (एमाले)लाई लक्षित गर्दै उनले सरकार गठनकाे विषयलाई लिएर अदालतसम्म पुगेका दुई दल मिलेर सरकार बनाएकाले अर्काे चुनावसम्म सरकार चलाउन आग्रह गरे ।
‘दुईवटा झगडिया दलहरू मिलेर सरकार चलाउँदै हुनुहुन्छ, तपाईंहरू ८४ सम्मै सरकार चलाउनु होस्,’ उनले भने,‘ जनताको पहरेदार भएर हामी अगाडि बढ्न चहान्छौं, यही भूमिका हामीलाई २०८४ सालसम्म रहनदिनुहोस् ।’
उनले चुनावमा मिलेर जानपनि आग्रह गरे । ‘८४ मा तपाईंहरू दुइटाले गठबन्धन गरेरै चुनाव लड्नुहोस्,’ उनले भने,‘ हामी जनतासम्म गठबन्धन गर्छौ, जनतासँग गठबन्धन गरेर चुनाव लड्छौँ ।’
सरकारमा सहभागी नभइ सत्तापक्षमा कांग्रेस बसेको बताउँदै उनले अचम्मको अभ्यास भएको बताए । प्रदेशमा अहिले सरकारविहीनताको अवस्थामा रहेको उनले बताए ।
मन्त्रालय मन्त्रीविहीन रहँदा बजेट कार्यान्वयनमाअन्योल भएको उनले बताए । अहिलेको बजेट वितरणमुखी रहेको बताउँदै सरकारसँग बजेट प्राथमिकता निर्धारण गर्न आग्रह गरे ।

























