
विराटनगर । बिपी कोइरालाको आदर्श र सिद्धान्त छाडेकै कारण नेपाली कांग्रेस कमजोर हुँदै गएको नेता महेश आचार्यले बताएका छन् ।
उनले सोमबार नेपाली कांग्रेस मोरङले बिपी कोइरालाको १११ औं जन्मजन्यतीका अवसरमा आयोजना गरेको विचार गोष्ठीलाई सम्बोधन यस्तो बताएका हुन् । नेता आचार्यले अहिले कांग्रेस इतिहासकै सबैभन्दा कठिन मोडबाट अगाडि बढीरहेको बताए ।
विभिन्न गुट, उपगुटले कांग्रेसलाई कमजोर बनाउँदै लगेको बताउँदै, नेता आचार्यले भने, ‘कांग्रेसमा रुपान्तरण जरुरी रहेको छ । निर्वाचनमा कसैैसित पनि गठबन्धन गर्नुहुँदैन भनेर आफूले बारम्बार भनेको थिएँ । कार्यकर्ताको भावनाविपरीत गरिएको गठबन्धनका कारण अहिले कांग्रेसको अवस्था कस्तो छ ?’
कांग्रेसका केन्द्रीय सदस्य तथा प्रदेशसभा सदस्य अमृत अर्यालले कांग्रेस एकढिक्का भएमा कसैले पनि निर्वाचनमा पराजित गर्न नसक्ने बताए । उनले अरुसँग लड्नपर्ने कांग्रेस आफैंसित लडिरहेको दुःखेसो पोखे ।
कोशी प्रदेशका पूर्वमुख्यमन्त्री केदार कार्कीले आफूले अघि सारेका योजनालाई स्थापित गर्न पार्टीले सहयोग नगरेको बताए ।

























