
विराटनगर । विराटनगरमा आइतबार राति भारतीय ट्रकमा मोटरसाइकल ठोक्किएर दुर्घटना हुँदा १ जनाको मृत्यु भएको छ ।
विराटनगर महानगरपालिका–१४ हनुमान मन्दिरनजिक कोशी राजमार्गस्थित सडकको साइडमा पार्किङ गरेर राखिएको यूपी ३ टी २८९१ नम्बरको ट्रकमा विराटनगरबाट रानीतर्फ जाँदै गरेको प्रदेश १–०२–०४४ प ८०८५ नम्बरको मोटरसाइकल ठोक्किएर दुर्घटना भएको हो । राति १०ः३० बजेतिर दुर्घटना हुँदा मोटरसाइकलको पछाडि सवार विराटनगर–१० का २५ वर्षीय कृष्ण मण्डलको मृत्यु भएको मोरङ ट्रफिक प्रमुख इन्सपेक्टर राजन लम्सालले जानकारी दिए ।
उनका अनुसार दुर्घटनामा परेर कृष्णसहित मोटरसाइकल चालक विराटनगर–१५ का १८ वर्षीय राजीव मण्डल गम्भीर घाइते भएका थिए । घाइतेमध्ये कृष्णको उपचारका क्रममा विराटनगर अस्पताल एवं विराट नर्सिङ होममा सोमबार बिहानका राति १ बजेतिर मृत्यु भएको लम्सालले बताए । उनका अनुसार गम्भीर अवस्थाका राजीवको उपचार जारी छ ।
दुर्घटनापछि फरार बनेका ट्रक चालक भारतको उत्तर प्रदेश मोहनगन्जका २८ वर्षीय मक्सुद आलमलाई खोजी गरेर नियन्त्रणमा लिँदै प्रहरीले घटनाको अनुसन्धान सुरु गरेको छ । मोटरसाइकलको तीव्र गतिका कारण दुर्घटना भएको प्रहरीको प्रारम्भिक अनुसन्धानबाट खुलेको छ ।























