
काठमाडौं । सभामुख देवराज घिमिरेले विभिन्न दलका प्रमुख सचेतक, सचेतक र समितिका सभापतिहरूसँग मंगलबार छलफल गरेका छन्।
संसदको आगामी अधिवेशनमा बिजनेसको अभाव हुन नदिन उनले छलफल गरेका हुन् । अधिवेशन नभएको अवस्थामा सांसदहरू जिल्ला बाहिर हुने र समितिको कोरम पुर्याउनसमेत कठिन भएको कुरा सभापतिहरूले सभामुखसमक्ष राखेका छन् ।
विभिन्न दलमध्ये सत्तारुढ नेकपा (एमाले) का मुख्य सचेतक महेश बर्तौला, नेपाली कांग्रेसका प्रमुख सचेतक श्यामकुमार घिमिरे, प्रतिपक्षी नेकपा (माओवादी केन्द्र) का प्रमुख सचेतक हितराज पाण्डे, राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियार र राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानेन्द्र शाहीलाई सभामुखले छलफलमा बोलाएका थिए ।
त्यस्तै, छलफलमा राज्य व्यवस्था तथा सुशासन समिति, पूर्वाधार विकास समिति, शिक्षा, स्वास्थ्य तथा सूचना प्रविधि समिति, उद्योग तथा वाणिज्य र श्रम तथा उपभोक्ता हित समिति, कानून, न्याय तथा मानव अधिकार समिति, अर्थ समितिका सभापतिलगायतलाई पनि बोलाइएको थियो । यी समितिहरूमा विभिन्न विधेयक विचाराधीन छन्।

























