
काठमाडौं । बालुवाटारमा बसेको सत्तारुढ दलहरुको बैठकमा सरकारको १ सय दिन सन्तोषजनक रहेको प्रधानमन्त्री ओलीले बताएका छन् ।
उनले १ सय दिनको मूल्यांकन सुनाउँदै शेयर बजारमा आएको सुधारका साथै अरु सूचकलाई देखाएर अर्थतन्त्र लयमा आउन थालेको बताए । बाढी पहिरोलगायतका जनसरोकारका सवालमा र सुशासनमा सरकारले गम्भिर भएर काग गरिरहेको सुनाए ।
रास्वपाका सभापति रवि लामिछाने पक्राउ परेको भन्दै प्रधानमन्त्री ओलीले भने, ‘सहकारी ठगीमा संलग्न जो कोहीमाथि पनि कारबाही हुन्छ ।’ उनले राष्ट्रिय राजनीतिका विषयमा सत्तारुढ दलहरुको साझा धारणा बनाउनु पर्नेमा समेत जोड दिए ।
काँग्रेस सभापति शेरबहादुर देउवाले प्रधानमन्त्री ओलीलाई साथ दिँदै सुरुको १ सय दिन सरकारका ‘हनिमुन पिरियड’ भएको र विपक्षीहरुले विरोध गरेर अनावश्यक भ्रम सिर्जना गर्न खोजेको बताए । देउवाले प्रधानमन्त्रीकाे कामकाे प्रशंसा गर्दै १ सय दिनकाे उपलब्धि एकदम ठीक भएकाे बताए ।
संसदीय छानबिन समितिको प्रतिवेदन मात्रै कार्यान्वयन गरेको बताउँदै, गृहमन्त्री रमेश लेखकले भने, ‘प्रधानमन्त्रीले रविलाई पूर्वाग्रहका आधारमा पक्राउ गरेको भनेर गलत प्रचार गरिए छ । रास्वपाले भीड जम्मा गरेर छानबिन र न्याय निरुपण प्रक्रियालाई नै प्रभावित पार्न खोजिएको छ ।’
काँग्रेसका पूर्वगृहमन्त्री बालकृष्ण खाँण, एमाले सचिव टोपबहादुर रायमाझी पक्राउ गर्दा आफूहरुले विरोध नगरेको भन्दै यसबारे बोल्न सत्तारुढ दलहरुलाई लेखकले आग्रह गरे ।

























