मोरङको सुन्दरहरैँचामा टिपरको ठक्करबाट महिलाको मृत्यु

विराटनगर । मोरङको सुन्दरहरैँचामा तीव्र गतिको टिपरले ठक्कर दिँदा बिहीबार दिउँसो १ जना महिलाको मृत्यु भएको छ ।

पूर्व–पश्चिम राजमार्गअन्तर्गत सुन्दरहरैँचा नगरपालिका–१० किस्ती पुलमा पूर्वबाट पश्चिमतर्फ आउँदै गरेको को १ क ३४१७ नम्बरको टिपरले पूर्वतर्फ जाँदै गरेको को २८ प ६१३२ नम्बरको स्कुटरलाई ठक्कर दिँदा दुर्घटना भएको हो । दिउँसो ३ः४० बजेतिर दुर्घटना हुँदा स्कुटर चालक महिलाको मृत्यु भएको छ ।

अन्दाजी ३०/३२ वर्षीया महिलाको पहिचान खुल्न बाँकी रहेको मोरङ प्रहरीका प्रवक्ता डीएसपी वेदप्रकाश जोशीले जानकारी दिए । उनका अनुसार टिपरले ठक्कर दिएपछि गम्भीर घाइते भएकी महिलालाई उपचारका लागि विराटनगरको कोशी अस्पताल ल्याइएको थियो ।

अस्पताल ल्याइपुर्याउनसाथ चिकित्सकले दिउँसो ४ः३० बजेतिर मृत घोषित गरिदिएको डीएसपी जोशीले बताए । शवलाई कोशी अस्पतालमै राखिएको छ ।

टिपर र स्कुटरलाई प्रहरीले नियन्त्रणमा लिएको छ । टिपर चालक फरार रहेकाले खोजी जारी राखिएको प्रहरीले जनाएको छ । डीएसपी जोशीले मृतकको पहिचानको प्रयास गर्दै घटनाको अनुसन्धान सुरु गरिएको जानकारी दिए ।