फैसलाको पूर्णपाठ आएपछि मनाङे अदालत हाजिर हुने

पोखरा । अपराधिक पृष्ठभूमिका गण्डकी प्रदेशसभा सदस्य एवं पूर्वमन्त्री दीपक मनाङेले फैसलाको पूर्णपाठ आइसकेपछि आफैं अदालत हाजिर हुने बताएका छन् ।

आफू सम्पर्कविहीन बनेको भनेर सार्वजनिक भएका समाचारप्रति उनले आफ्नो ध्यानाकर्षण भएको उल्लेख गरेका छन् । शुक्रबार एक विज्ञप्ति जारी गर्दै प्रदेशसभा सदस्य मनाङेले सर्वोच्च अदालतबाट भएको फैसलाको पूर्णपाठ प्राप्त भइसकेपछि आफैं अदालत उपस्थित हुने बताए ।

सम्पर्कविहीन बनेको भन्ने समाचारप्रति उनले आपत्ति जनाएका छन् । यद्यपि, सर्वोच्चको फैसला आएपछि सञ्चारमाध्यमबाट बारम्बार फोन आइरहेका कारण केही समयका लागि आफूले प्रयोग गर्दै आइरहेको मोबाइल बन्द गरेको उनले स्वीकारेका छन् ।

सञ्चारमाध्यममा भ्रमक र तथ्यहीन समाचार आइरको भन्दै उनले आपत्ति जनाए । मनाङेले सर्वोच्च अदालतमा विचाराधीन रहेको आफ्नो मुद्दाको फैसला भएको विषय आफ्नो कानुन व्यावसायीमार्फत थाहा पाएको बताएका छन् । उनले फैसलाको पूर्णपाठ लिखित रुपमा प्राप्त भएपछि अदालतमा उपस्थित हुने समेत जनाएका छन् ।

मनाङेलाई ५ वर्ष कैद हुने उच्च अदालत (तत्कालीन पुनरावेदन अदालत) पाटनको फैसलालाई सर्वोच्च अदालतले सदर गरेको थियो ।