
काठमाडौं । नेकपा (एमाले)का नेताहरु १० दिनका लागि चीन भ्रमणमा निस्किएका छन् । चिनियाँ कम्युनिष्ट पार्टीको निमन्त्रणामा एमालेका वरिष्ठ उपाध्यक्ष ईश्वर पोखरेल नेतृत्वको टोली मंगलबार दिउँसो चीन प्रस्थान गरेको हो ।
टोलीमा एमाले सचिव लेखराज भट्ट, स्थायी कमिटी सदस्य गोरख बहादुर बोगटीलगायत १५ जना छन् । टोलीमा सातै प्रदेशको प्रतिनिधित्व हुने गरी १० पुरुष र पाँचजना महिला नेताहरू सहभागी रहेको एमालेले जनाएको छ ।
पोखरेलले चीनको नानजिङ्गमा आयोजना हुने दोश्रो ग्लोबल साउथ थिन्क ट्यांक फोरमलाई प्रमुख वक्ताका रुपमा सम्बोधन गर्ने कार्यक्रम छ । भ्रमण अवधिमा टोली चीनको जाङ्सु, उहान, बेइजिङलगायतका स्थानहरुमा आयोजना हुने विभिन्न औपचारिक कार्यक्रमहरुमा सहभागी हुने छन् । भ्रमण सकेर टोली मंसिर ६ गते नेपाल फर्किने कार्यक्रम छ ।

























