
मकवानपुर । बागमती प्रदेश सरकारले मन्त्रालय विभाजन गर्दै भागबण्डा मिलाएको छ ।
मुख्यमन्त्री तथा मन्त्रीपरिषद्को आज बसेको बैठकले संस्कृति, पर्यटन तथा सहकारी मन्त्रालयबाट सहकारीलाई अलग गरी सहकारी तथा गरिबी नियन्त्रण मन्त्रालय बनाएको हो ।
बागमती प्रदेशका मुख्यमन्त्री बहादुर सिंह लामा नेतृत्वको सरकारले मन्त्रालय फुटाएर भागबण्डा मिलाएका हुन् । मन्त्रालय फुटाएर बिना विभागीयमन्त्री मधु श्रेष्ठलाई जिम्मेवारी तोक्नका लागि सरकारले मन्त्रालयको संख्या बढाएको हो ।
बागमती प्रदेशमा मन्त्रालयको संख्या १४ पुग्यो । श्रेष्ठ कांग्रेसबाट निर्वाचित प्रदेशसभा सदस्य हुन् । उनले गत साउन ९ गते विना विभागीय मन्त्रीको शपथ लिएका थिए ।
मन्त्रीपरिषद्को बैठकले विना विभागीय मन्त्री श्रेष्ठलाई चाँडै मन्त्रालयको जिम्मेवारी प्रदान गर्ने सरकारका प्रवक्ता एवं आन्तरिक मामिला तथा कानुनमन्त्री सुरजचन्द्र लामिछानेले जानकारी दिए ।

























