
काठमाडौं । अनुसन्धानका क्रममा हिरासतमा रहेका कोशी प्रदेशका पूर्वमन्त्री लिलाबल्लभ अधिकारीसहित ९ जनाको मंगलबार पुनः म्याद थप भएको छ ।
नेकपा (एमाले)का प्रदेशसभा सदस्यसमेत रहेका अधिकारीमाथि मानव बेचबिखन तथा ओसारपसार र किर्ते अभियोगमा प्रहरीले अनुसन्धान गरिरहेको छ । सबै जनालाई अरु ५ दिन हिरासतमा राखेर अनुसन्धान अघि बढाउन काठमाडौं अदालतका न्यायाधीश गायत्रीप्रसाद रेग्मीको इजलासले थप म्याद दिएको हो ।
यसअघि कात्तिक २७ गते अदालतले ७ दिनको म्याद दिएको थियो । सरकारको स्वीकृति नलिइकन जापान भ्रमणमा गएर विवादमा परेका अधिकारीमाथि मावन तस्करी गरेको गम्भीर आरोप लागेको छ ।
उनी कात्तिक ११ गते जापान उडेका थिए । त्यो भ्रमण विवादमा परेपछि उनले आन्तरिक मामिला तथा कानुनमन्त्रीबाट राजीनामा दिएका थिए । उनकै पार्टीले पनि सबै जिम्मेवारीबाट तत्काललाई निलम्बन गरेको छ ।
उनलाई कात्तिक २५ गते आइतबार प्रहरीले विराटनगरस्थित निवासबाटै पक्राउ गरेर काठमाडौं लगेको थियो । यो प्रकरणमा हालसम्म मन्त्री अधिकारीसहित ९ जना पक्राउ परिसकेका छन् । जनक राई, दावा शेर्पा, कञ्चन देवकोटा, महेश पाण्डे, जुगल रिजाल, वीरबहादुर सुनुवार, गुडी राई र नवीन राईमाथि अनुसन्धान भइरहेको हो ।

























