
काठमाडौं । चीनको निमन्त्रणामा प्रधानमन्त्री केपी शर्मा ओली आज बिहान ११ बजे हिमालय एयरालाइन्सको विशेष चार्टर विमानबाट प्रस्थान गरेका छन् ।
चिनियाँ समकक्षी ली छ्याङको निमन्त्रणामा चीन गएका प्रधानमन्त्री ओली आजै साँझ ६ः१० बजे राजधानी बेइजिङ पुग्नेछ ।
यस भ्रमणले नेपाल–चीनबीचको मैत्रीपूर्ण सम्बन्धलाई थप प्रगाढ बनाउने विश्वास गरिएको छ । भ्रमणमा सरकारीतर्फ ४६ र निजी क्षेत्रबाट ३२ गरी ७८ सदस्यको सहभागिता रहेको छ ।
बेइजिङस्थित नेपाली राजदूतावासबाट सरकारी प्रतिनिधिमण्डलमा ८ सदस्य थपिने छन् । सरकार टोलीका ४६ मध्ये २ सदस्य तयारीका क्रममा चीन पुगिसकेका छन् ।
प्रधानमन्त्री ओली २० गते स्वदेश फर्किने कार्यक्रम रहेको छ । प्रधानमन्त्री ओली चीन प्रस्थान गरेपछि कार्यवाहक प्रधानमन्त्रीको जिम्मेवारी प्रकाशमान सिंहले पाएका छन् ।

























