
विराटनगर । नेपाली कांग्रेस नेता कृष्णप्रसाद सिटौलाले नेता शेखर कोइरालाले प्रदेश समितिको पहिलो सम्मेलन बहिष्कार गरेको विषयमा असन्तुष्टि व्यक्त गरेका छन् ।
सम्मेलनको उद्घाटन शत्रमा बोल्दै उनले शेखर कोइरालाले सम्मेलन छाड्दा दुःख लागेको बताएका हुन् ।
‘ पार्टीमा वृहत एकता चाहिन्छ, यसको विकल्प नै छैन, तर पार्टी एकताका नाममा हामीले हाम्रा कुरा राख्ने ठाउँमा नबसेर बाहिर गयो भने त्यसले झन समस्या हुन्छ,’ उनले भने ।
‘मेरा प्रिय साथी शेखरले यहीँ कुरा उठाइदिनु भएको भए हुन्थ्यो, के कारणले छाड्नुपर्ने हामीलाई थाहा हुन्थ्यो, हामी निर्णयमा पुग्न सक्थ्यौं,’ उनले भने, ‘केन्द्रीय समितिमा राखे पनि हुन्छ । त्यहाँ छलफलको विषय बन्छ, विधानले समाधान दिने हो, कुरा के हो त प्रष्टसँग हामी सबैले थाहा पाउने गरी राख्नु उचित हुन्छ ।’
उनले पार्टीलाई एकतावद्ध बनाएर लैजान आग्रह गरे ।

























