
झापा । नेपाली कांग्रेस कोशी प्रदेशले बुधबारदेखि ‘कचनकवल–सगरमाथा जागरण’अभियान सुरु गरेको छ ।
सबैभन्दा होचा स्थान झापाको कचनकवल स्तम्भबाट सुरु भएको अभियान विश्वको अग्लो चुचुरो सगरमाथामा पुगरे समापन हुनेछ ।
जागरण अभियान आगामी असार २० गते विश्वकै अग्लो चुचुरो सगरमाथामा पुगेर समापन हुने नेपाली कांग्रेस कोशी प्रदेशका सभापति उद्धव थापाले जानकारी दिए ।
उनले संगठन सुदृढीकरण, ऐतिहासिक खोज, समृद्धिको आधार, जलवायु परिवर्तन प्रभाव र पहिचानको उद्देश्यका साथ अभियान सुरु गरेको बताए । अभियान ७ महिनासम्म चल्ने छ ।
अभियानले प्रदेशका १४ वटै जिल्लामा कार्यक्रम गर्ने छ । कोशी प्रदेशको प्राकृतिक, सांस्कृतिक र सामाजिक पक्षहरूको महत्वलाई अभियानका क्रममा उजागर गर्दै, समग्र प्रदेशको विकास, एकता र समृद्धिको सन्देशलाई अझ बलियो बनाउने अपेक्षा रहेको सभापति थापाले बताए ।
जागरण अभियानले संगठन सुदृढीकरण, पार्टीमा देखिएको गुट–उपगुटको अन्त्य गर्दै पार्टीलाई थप मजबुत र चलायमान बनाउन महत्वपूर्ण भूमिका खेल्ने सभापति थापाले विश्वास लिएको बताए ।
जागरण अभियानको उद्घाटनका क्रममा नेपाली कांग्रेसका महामन्त्री विश्वप्रकाश शर्मा, नेता कृष्णप्रसाद सिटौलालगायतको उपस्थिति रहेको थियो ।

























