माघ २२ देखि कोशी प्रदेशमा एचपीभी खोप लगाइँदै 

विराटनगर । माघ २२ गतेदेखि  फागुन ७ गतेसम्म कोशी प्रदेशका सबै जिल्लामा लगाउने एचपीभी खोप अभियानको तयारी पूरा भएको स्वास्थ्य निर्देशनालय कोशी प्रदेशले जनाएको छ ।

मंगलबार विराटनगरमा एचपीभी खोप अभियान २०८१ का बारेमा सरोकारवालाहरूसँग भएको अभिमुखीकरण कार्यक्रममा खोपका लागि सम्पूर्ण तयारी पूरा भएको जानकारी दिइएको थियो । 

Advertisement

१० देखि १४ वर्ष उमेर समूहका किशोरीहरूलाई दिइने एचपीभी खोप कोशी प्रदेशमा २ लाख ६५ हजारलाई दिइने लक्ष्य रहेको छ ।

५ हजार ९२ जना स्वास्थ्यकर्मी परिचालन गरिएको छ भने १० हजार ४ जना स्वयंसेवक खटाइने तयारी गरिएको छ ।  सबै जिल्ला स्वास्थ्य कार्यालयहरूमा एचपीभी खोप र अन्य आवश्यक सामग्री पुगिसकेका छन् ।

पाठेघरको मुखको क्यान्सर प्रमुख कारक एचपीभी भएकाले खोपबाट रोकथाम गर्न सकिने भएको हुँदा यो अभियान सञ्चालन हुने भएको हो । 

पाठेघरको मुखको क्यान्सर निवारण गर्ने विश्वव्यापी रणनीतिलाई अवलम्बन गर्दै राष्ट्रिय खोप सल्लाहकार समितिले राष्ट्रिय खोप तालिकामा एचपीभी खोप समावेश गरिएको हो ।

विद्यालयमा अध्ययन गर्ने कक्षा ७ देखि १० सम्मका छात्रा र विद्यालय नजाने ११ देखि १४ वर्षका किशोरीहरूलाई खोप लगाइने छ ।