विराटनगरबाट मानव कंकालसहित १ जना पक्राउ

विराटनगर । विराटनगरबाट मानव कंकालसहित १ जनालाई सशस्त्र प्रहरीले आइतबार बिहान पक्राउ गरेको छ ।

सशस्त्र प्रहरी बल प्रस्तावित सीमा सुरक्षा गुल्म रानीबाट खटिएको टोलीले विराटनगर महानगरपालिका–१७ का ३७ वर्षीय विनोद रायलाई पक्राउ गरेको हो । भारतबाट मानव कंकाल लिएर आउँदै गर्दा रायलाई पक्राउ गरिएको गुल्मका प्रमुख एवं सशस्त्र प्रहरी बलका डीएसपी ऋषिकेश राउतले जानकारी दिए ।

Advertisement

उनका अनुसार रिक्सामा राखेर भारतबाट मानव कंकाल लिएर आउँदै गर्दा विराटनगर–१५ स्थित २ नम्बर ढाटमा ड्युटीमा रहेको सशस्त्र प्रहरीले फेला पारेको थियो । पक्राउ परेका रायले बोकेको झोलाबाट ३८ वटा मानव खप्पर र १० वटा नली खुट्टा बरामद भएको छ ।

उनीसँगै रहेकी १ जना महिला रिक्साबाट ओर्लिएर फरार भएकाले खोजी तीव्र पारिएको सशस्त्र प्रहरीले जनाएको छ । सशस्त्रले रायलाई आवश्यक कारबाहीका लागि इलाका प्रहरी कार्यालय रानीको जिम्मा लगाएको छ ।

सशस्त्र प्रहरीका अनुसार राय यसअघि पनि मानव कंकालसहित विराटनरबाट पक्राउ परेका थिए । सशस्त्रले यसअघि २०७८ असोज र चैतमा पनि मानव कंकाल बरामद गरेको थियो ।