
विराटनगर । पूर्वगृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध दर्ता भएको मुद्दाको थुनछेक बहस आज (बुधबार) सकिएन ।
जिल्ला अदालत चितवनका न्यायाधीश दयाराम ढकालको इजलासमा आजै उनको बयान लिइएको थियो । बयान सकिएपछि बहस सुरु भयो । तर, पहिलो दिन जाहेरवाला (सहकारी पीडित) र सरकारी वकिलसहित ४ जनाले बहस गरेका छन् ।
सरकारी वकिलका तर्फबाट जिल्ला न्यायाधिवक्ता रवि न्यौपाने, सहन्यायाधिवक्ता अमृत सुवेदी र बुद्धबहादुर थापाले बहस गरेका हुन् । त्यस्तै, जाहेरवालाको तर्फबाट अधिवक्ता रमेश काफ्लेले बहस गरेका छन् ।
साहरा चितवन बहुउद्देश्यीय सहकारी संस्थाको रकम अपचलन मुद्दाको बहस बिहीबार पुनः हुने छ । अदालतका सूचना अधिकारी अमृत विश्वकर्माका अनुसार अब ३ जना सरकारी वकिल र रविको तर्फबाट १० जना कानुन व्यवसायीले बहस गर्ने छन् ।
लामिछानेसहित १५ जनाविरुद्ध मंगलबार चितवन अदालतमा मुद्दा दायर भएको थियो । १२ जनाविरुद्ध संगठित अपराध र ठगी दुवै अपराधमा मुद्दा दर्ता भए पनि लामिछानेविरुद्ध भने ठगी मुद्दा मात्रै दर्ता भएको छ ।
लामिछानेसहित १५ जनाविरुद्ध पुरक अभियोग दर्ता भएको हो । त्यसअघि १७ जनाविरुद्ध मुद्दा दर्ता भएको थियो । ३२ जनाविरुद्ध ३८ करोड ९ लाख रुपैयाँ बिगो दाबीसहित मुद्दा दायर भएको हो ।
बहस नसकिएपछि लामिछानेलाई चितवन जिल्ला अदालतले हिरासतमा राख्न आदेश दिएको छ । पुनः बहसका लागि उपस्थित गराउने गरी अदालतले हिरासतमा राख्न प्रहरीलाई अनुमति दिएको हो ।

























