
काठमाडौं । राष्ट्रिय स्वतन्त्र पार्टी (रास्वपा)ले पार्टी अध्यक्ष रवि लामिछानेको संसद पद निलम्बन फुकुवा हुनुपर्ने माग गरेको छ ।
प्रतिनिधिसभाको बैठकमा शुक्रबार बोल्दै पार्टीका कार्यवाहक सभापति एवं सांसद डीपी अर्यालले लामिछानेमाथि संसदले पनि प्रतिशोध साँधेको आरोप लगाए । उनले संसदले पनि सरकारको रबैयालाई समर्थन गरेको बताए ।
सरकारले प्रतिशोध साँध्दा संसदले पनि त्यही बाटो अपनाएको अर्यालको भनाइ छ । चौथो ठूलो दलको सभापतिमाथि यो हदसम्मको प्रतिशोधको मूल्य सरकारले पक्कै पनि चुकाउनुपर्ने उनको भनाइ छ । पूर्वगृहमन्त्रीसमेत रहेका लामिछानेमाथि सरकारले झुटा मुद्दा लगाएर फसाउने कुनियत राखेको कुरा जनतालाई प्रष्ट थाहा भइसकेको अर्यालको भनाइ छ ।
अर्यालले लामिछानेको सांसद पद निलम्बनको फुकुवा गर्न सभामुख देवराज घिमिरेसँग माग गरेका छन् । थुनामा नरहेको अवस्थामा सांसद पद निलम्बन नहुने व्यवस्थालाई कार्यान्वयन गर्दै लामिछानेको सांसद पदको निलम्बन तत्काल फुकुवा गर्न उनले सभामुखसमक्ष माग गरेका हुन् ।
























