
विराटनगर । नेकपा (माओवादी केन्द्र)ले आज (सोमबार)देखि तराई–मधेस जागरण अभियान सुरु गरेको छ । पार्टी अध्यक्ष पुष्पकमल दाहाल ‘प्रचण्ड’ले अभियानको उद्घाटन गरे ।
झापाको कचनकवल गाउँपालिकाको हुकाहुकी चोकमा प्रचण्डले अभियानको शुभारम्भ गरेका हुन् । झापाबाट सुरु भएको अभियान चैत ७ गते कन्चनपुरमा पुगेर समापन गर्ने माओवादीको तयारी छ ।
अभियानमा केन्द्रदेखि प्रदेश, जिल्ला र पालिकाका सम्पूर्ण नेता कार्यकर्ता परिचालित हुने माओवादीले जनाएको छ । माओवादीको गत पुस २१–२३ बसेको केन्द्रीय समिति बैठकको निर्णयअनुसार अभियान सुरु भएको हो ।
प्रतिगमनको खतराविरूद्ध खबरदारी गर्दै संविधान रक्षा, सुशासन, सामाजिक न्याय र समृद्धिको बाटो हुँदै समाजवादी क्रान्तिको आधार तयार गर्नका लागि अभियान सञ्चालन गरिएको माओवादी केन्द्र कोशी प्रदेशका अध्यक्ष हर्कबहादुर नेम्बाङ मिक्सोले बताए । उनका अनुसार दलाल, बिचौलिया तथा भ्रष्टाचारीलाई संरक्षण गर्ने सरकारी प्रवृत्तिको विरोध र भण्डाफोर गर्न, अध्यादेशमार्फत् राज्य सञ्चालन गर्ने र देशलाई दुई दलीय तानाशाहीतर्फ लैजान खोज्ने सरकारको निरंकुश प्रवृत्तिको विरोध गर्दै भूमिहीन, सुकुम्बासी, अव्यवस्थित बसोबासीका समस्या तत्काल समाधानका लागि दबाब दिन अभियानले महत्वपूर्ण भूमिका खेल्ने अपेक्षा गरिएको छ ।
दबाबमूलक अभियानमा प्रचण्डसहित नेताहरू नारायणकाजी श्रेष्ठ, पम्फा भुसाल, अग्नी सापकोटा, देव गुरुङ, वर्षमान पुन, जनार्दन शर्मा, हरिबोल गजुरेल, शक्ति बस्नेतलगायत सहभागी छन्। अभियानअन्तर्गत झापाको बारदशी गाउँपालिकाको राजगढ र झापा गाउँपालिकामा आजै कार्यक्रम हुने बताइएको छ ।
यो अभियान सकेर वैशाखमा मध्यपहाडी लोकमार्ग केन्द्रित जनतासँग माओवादी पूर्व–पश्चिम जागरण अभियान सञ्चालन गर्ने माओवादीको तयारी छ ।

























