
विराटनगर । काेशी प्रदेशसभा बैठकमा प्रधानमन्त्रीकाे सम्बाेधन बहिष्कार गर्ने चेतावनी दिएका प्रतिपक्षी दल बैठकमा सहभागी हुन सहमत भएका छन् । कोशी प्रदेशका मुख्यमन्त्री हिक्मतकुमार कार्कीसँगकाे भेटपछि प्रमुख प्रतिपक्षी माओवादी केन्द्रसहित प्रतिपक्षी दल प्रधानमन्त्रीकाे सम्बाेधनका क्रममा बैठकमा बस्न सहमत भएका हुन् ।
कोशीको प्रदेशसभा बैठकलाई आज प्रधानमन्त्री केपी शर्मा ओलीले सम्बोधन गर्ने कार्यसूची छ । प्रधानमन्त्रीले सम्बोधन गर्ने बेलामासमेत सरकारले समन्वयन नगरेको भन्दै माओवादी केन्द्रसहित प्रतिपक्षी दलले बैठक बहिस्कारको धम्की दिएका थिए ।
प्रतिपक्षीले बैठक बहिष्कार गर्ने बताएपछि मंगलबार बिहान मुख्यमन्त्री कार्कीले माओवादी केन्द्र संसदीय दलका नेता इन्द्रबहादुर आङ्बोसँगको भेटेका थिए । विराटनगरको बिग होटलमा दुई नेताको छलफलपछि विवाद मिलेको हो ।
आङ्बोले मुख्यमन्त्रीले प्रधानमन्त्रीले संस्थागत ढंगले बोल्ने, कसैलाई घोचपेच नगर्ने र विपक्षी दलहरुलाई औपचारिक निमन्त्रणा नगरेको विषयमा कमजाेरी भएकाे भनि स्वीकार गरेका बताए ।
संसद बैठकमा सहभागी हुने विषयमा भने छलफलपछि निर्णय गर्ने उनले बताए । ‘हामीले जे कन्सन राखेका थियौं, त्यो कन्सन सम्बोधन गर्ने भइसकेपछि विषय सकारात्मक भयो,’ उनले भने,‘विपक्षी दलहरुसँग छलफल गरेर निर्णयमा पुग्छौं ।’
प्रधानमन्त्री ओलीले आज २ बजेपछि बस्ने प्रदेशसभाको बैठकलाई सम्बोधन गर्ने कार्यक्रम छ । सरकारले बिपक्षी दलहरुलाई हेप्ने काम गरेको भन्दै प्रधानमन्त्रीको सम्बोधन बहिष्कार गर्ने चेतावनी दिएपछि कार्कीले प्रतिपक्षीले उठाएका विषय सम्बोधन गर्ने बताएका थिए । प्रतिपक्षी दलहरुले संसदप्रति उत्तरदायी हुनुपर्ने र संसदलाई सरकारको छायामा पार्न नहुने सर्त राखेका थिए ।
























