कोशी प्रदेशसभामा प्रधानमन्त्री ओलीको १ घण्टा ५ मिनेट सम्बोधन, के भने ?

Share this
732shares
मुलुकी खबर
मुलुकी खबर
clock२०८१ फागुन २७, मंगलबार १६:४७

विराटनगर । प्रधानमन्त्री केपी शर्मा ओलीले कोशी प्रदेशसभा बैठकलाई आज (मंगलबार) विशेष सम्बोधन गरेका छन् । उनले १ घण्टा ५ मिनेट सम्बोधन गरेका हुन् ।

सम्बोधनका क्रममा उनले आफूलाई वादविवादमा अल्झिन मन नभएको र देशको मुहार फेर्नेतर्फ केन्द्रित भएको बताए । जनताका कुरा सुन्न र जनताका भावनालाई सम्बोधन गर्न आफू तयार रहेको ओलीले बताए ।

उनले नेपाल विकासशील राष्ट्रमा परिणत हुने क्रममा रहेको बताए । मुलुकलाई अगाडि बढाउन उद्यमशीलतामा जोड दिनुपर्ने उल्लेख गर्दै ओलीले अरुको सहायतामा बाँच्छु भन्ने कुरालाई त्याग्नुपर्नेमा जोड दिए । प्रधानमन्त्री ओलीले नेपाली अब आफ्नै बलमा बाँच्नुपर्ने बताए ।

‘वनसँग सहमति गरेर वन क्षेत्रमा फलफूल खेती गर्न र त्यसमा कृषकलाई जोड्न सकिन्छ । साना उद्योग स्थापना गर्न जनतालाई सहयोग गर्नुपर्छ । नजानेमा सिकाउनुपर्छ । जनप्रतिनिधिले पुलको काम गरौं । यसो भयो भने जनतालाई विकासमा जोड्न सकिन्छ,’ ओलीले भने । भावनामा बगेर नभइकन देशलाई अघि बढाउनेतर्फ केन्द्रित हुनुपर्नेमा प्रधानमन्त्रीको जोड छ ।

‘दुनिया अगाडि बढिसकेको हुन्छ । हामी ठूला कुरा गरेर बस्छौं । पछाडि पर्छौं । हाम्रो देश गरिब भइरहन्छ,’ ओलीले भने, ‘जनतालाई बचतको स्थितिमा पुर्याउन सकियो भने र आम्दानीलाई बचतमा परिणत गरियो भने देश धनी हुन्छ । जनता धनी हुन्छन् । जनताको जीवनस्तर पनि उक्सिन्छ ।’ उत्पादन, शिक्षा, स्वास्थ्य सबै क्षेत्रका लागि विज्ञान र प्रविधिको प्रयोग गर्नुपर्नेमा उनको जोड छ । ओलीले मानव जातिले विकास गरेका सुविधाको समुचित प्रयोगमा ध्यान दिनुपर्ने बताए ।

‘मुलुकमा केही नभएको हैन, विकास धेरै भएको छ । ३३ प्रतिशत महिला आज ‘पार्लियामेन्ट’मा हुनुहुन्छ । हामीले आरक्षण बढोस् भन्दा पनि क्षमता वृद्धिको अवसर पाउनुपर्छ भन्ने कुरा हो । दक्ष नागरिक उत्पादन आजको आवश्यकता छ । सबै कुरा मानवको हित, कल्याण र भविष्यका लागि हाम्रा प्रयासलाई सचेत र योजनाबद्ध ढंगले अगाडि बढाउनुपर्छ,’ प्रधानमन्त्रीले भने । उनले प्रदेशसभाले राम्रा काम तर्जुमा गर्ने र त्यसको कार्यान्वयन प्रदेश सरकारले राम्ररी अगाडि बढाउने विश्वास लिएका छन् ।

उनले प्रदेश सरकारलाई सहयोग गर्न संघीय सरकार तयार रहेको बताए । जनता र जनप्रतिनिधिका कुरा सुन्नका लागि सरकार बनेको उनको जिकिर छ । ओलीले राजनीतिक व्यवस्थासँगै मुलुकको अवस्था पनि परिवर्तन भएको बताए । उनले केही भएन भन्ने भाष्य गलत भएको दाबी गरे । जनताको अवस्थामा पनि सुधार भएको उनको भनाइ छ ।

उनले कृषिको क्षेत्रमा ध्यान नपुगेको बताए । कृषिलाई विकास र समृद्धिको आधार बनाउने योजनामा सरकार रहेको ओलीले बताए । आधारभूत आवश्यकता पूरा गरी गरिबी हटाएर समृद्धिको बाटोमा लाग्न सरकार प्रतिबद्ध रहेको ओलीले बताए ।

सरकारले कृषि, पर्यटन, व्यापारसहित बृहत् क्षेत्रमा काम गरिरहेको बताउँदै उद्यमशीलताको विकासका लागि सरकारले ध्यान दिइरहेको बताए । सरकारी जागिर थोरैले प्राप्त गर्ने बताउँदै उनले उद्यमशीलतामा जोड दिइरहेको उल्लेख गरे ।

ओलीले देशलाई आवश्यक पर्ने श्रमिकको संख्या पर्याप्त नभएको पनि बताएका छन् । मुलुकको निर्माण व्यवसायको क्षेत्रमा मात्रै २० लाख श्रमिक आवश्यक रहेको उनको भनाइ छ । ‘निर्माण व्यवसायको क्षेत्रमा नै २० लाख श्रमिक चाहिएको छ । तर, ६–७ लाख मात्रै श्रमिक छन् । त्यो पनि पारिपट्टी (भारत)बाट ल्याएर काम गर्नु परेको छ,’ ओलीले भने ।

प्रधानमन्त्री ओलीले श्रमिकमा दक्षता र व्यावसायिक तालिमको अभाव रहेको बताए । ‘श्रमिकलाई व्यावसायिक तालिमको अभाव छ । जसका कारण श्रमिकले काम नपाउने समस्या छ । अनि काम पाइएन भनेर मान्छे विदेश जान्छन् । प्रविधिको प्रयोग गर्न श्रमिकले सकेका छैनन् । प्रविधिको प्रयोगमा श्रमिकलाई दक्ष बनाउन हामीले पहल गरिरहेका छौं,’ उनी भन्छन् ।

उनले केही गैरसहकारी तत्व सहकारीमा प्रवेश गरेको पनि बताए । ‘गैरसहकारी तत्वलाई सहकारीमा प्रवेश गर्न दिन हुँदैन थियो । त्यसले गर्दा सहकारीको बदनाम भयो,’ उनले भने । कृषि क्षेत्रलाई आधुनिकीकरण र व्यवस्थित गर्नेतर्फ सरकारले काम गरिरहेको उनको भनाइ छ ।

‘मुलुकलाई पछाडि फर्काउने हैन । अगाडि बढाउने हो । मदन भण्डारी राजमार्ग, मध्य पहाडी लोकमार्गजस्ता ठूलो आयोजनाको काम तीव्र गतिमा भइरहेको छ । दिगो विकास लक्ष्य भेट्नका लागि मुलुकमा ४८ प्रतिशत काम अघि बढेको छ,’ ओलीले भने ।

उनले कोशी प्रदेशमा गरिबी निवारण चाँडो गर्न सकिनेसमेत बताए । ओलीले गरिबी निवारणको काम कोशीमा चाँडो गर्न सकिने बताएका हुन् । २० प्रतिशतभन्दा बढी नागरिक निरपेक्ष गरिबीको रेखामुनि रहेको भन्दै उनले कोशी प्रदेशमा निरपेक्ष गरिबीको संख्या अलि थोरै रहेको उल्लेख गरे ।

कोशी आफ्नो गृहप्रदेश भएको बताउँदै ओलीले कोशी प्रदेशको विकास तीव्र गतिमा हुनुपर्नेमा जोड दिएका छन् । व्यवस्थाविरुद्ध आवाज उठ्न थालेको भन्दै उनले योभन्दा राम्रो प्रणाली के हो भनेर प्रश्न गरेका छन् । राम्रो प्रणालीका लागि तयार रहेको बताउँदै उनले लोकतान्त्रिक प्रणालीको बाटोबाट नै सरकार अघि बढ्ने स्पष्ट पारे ।

‘अहिले शान्ति र एकता चाहिएको छ । हाम्रो देश विविधतायुक्त भएकाले हामीमा एकता हुनुपर्छ । यति सानो देश यति विविधतायुक्त छ । यसमा एकता पनि छ । पहिले विभेद थिए । राजनीतिक प्रणालीले नै विभेद हुर्काएको थियो । अहिले हामी त्यो प्रणालीमा छैनौं । जनतन्त्रमा छौं,’ ओलीले भने ।

सामाजिक न्याय र समानता कायम गर्दै सामाजिक सद्भावमार्फत राष्ट्रिय एकता कायम गर्ने ढंगले अघि बढ्नुपर्ने आवश्यता रहेकोमा ओलीको जोड छ । ‘देश विकासका लािग शान्ति चाहिएको छ । अब पछाडि फर्कन सक्दैनौं । आफ्नो क्षमताको हिसाबले जो पनि अघि बढ्न सक्छ,’ उनले भने ।

उनले नागरिक सर्वोच्चता भएको प्रणालीबारे स्पष्ट रहेको बताए । २ पटकको संविधानसभाले जनतामा शक्ति रहेको संविधान निर्माण गरेको बताउँदै उनले यसलाई दुईतिहाइले संशोधन गर्नसक्ने उल्लेख गरे । सबैसँगको सहमतिमा संविधान संशोधन गर्न सकिने उनको भनाइ छ ।

तपाइको प्रतिक्रिया
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
भन्सार छली सुन लैजान खोज्ने चिनियाँ नागरिक पक्राउ
खराब मौसमले विराटनगरका बिहानका सबै उडान रद्द, सयौँ यात्रु प्रभावित
इनम सापकोटा प्रकरणमा सरकारको अनुसन्धानमाथि पोखरेलको प्रश्न
कनकाईमा आगजनीबाट दुई कुन्यूको धान र पराल नष्ट
एकै महिनामा १२ हजारभन्दा बढी चालक कारबाहीमा
© 2024 Muluki Khabar. All Rights Reserved. Design & Develop By: Indesign Media Pvt. Ltd.