
काठमाडौं । सरकारले संसदको हिउँदे अधिवेशन अन्त्य गर्ने तयारी गरेको छ ।
सभामुख देवराज घिमिरे अन्तर व्यवस्थापिका संघ आईपीयूको सम्मेलनमा सहभागी हुन चैत २२ गते उज्वेकिस्तान जाने तयारी छ । उनी जानुभन्दा अघि नै संसदको हिउँदे अधिवेशन अन्त्यको तयारी भएको हो । अधिवेशन चैत २० गते भित्र अन्त्य गर्ने याेजना रहेकाे संसद सचिवालय स्राेतले जनाएकाे छ ।
अन्तर व्यवस्थापिका संघको सम्मेलन चैत २३ गतेदेखि २७ गतेसम्म हुनेछ ।
संसदको हिउँदे अधिवेशन गत माघ १८ गते सुरु भएको थियो ।
अधिवेशन अन्त्यअघि नै पाँच वटा प्रतिस्थापन विधेयक संघीय संसदका दुवै सदनबाट पास गरी राष्ट्रपतिबाट प्रमाणीकरण गर्ने तयारी छ ।
सरकारले हिउँदे अधिवेशन आह्वान हुनुभन्दा करिब एक हप्ता अगाडि ६ वटा अध्यादेश जारी गरेको थियो । तीमध्ये भूमिबाहेकका पाँच वटा प्रतिस्थापन विधेयकमार्फत् कानुन संशोधन प्रक्रिया अघि बढाइएको थियो ।
























