
विराटनगर । नेकपा एमाले निकट पत्रकारहरुको संगठन प्रेस चौतारी नेपालको १० औं महाधिवेशनको तयारी पूरा भएको छ । विराटनगरमा भोलिबाट हुने महाधिवेशनकाे तयारी पूरा भएकाे हाे ।
तीन दिनसम्म चल्ने महाधिवेशनको प्रधानमन्त्री एवं नेकपा एमालेका अध्यक्ष केपी शर्मा ओलीले उद्घाटन गर्ने तयारी छ । तर ओली आउने सम्भावना न्यून छ ।
महाधिवेशनमा देशभरबाट ९ सय प्रतिनिधि सहभागी हुनेछन् । महाधिवेशनको लागि सबै तयारी पूरा भएको चौतारीका केन्द्रीय सचिव विक्रम लुइँटेलले जानकारी दिए । उनका अनुसार प्रतिनिधिहरु आउने क्रम जारी छ ।
भोलि बिहान १० बजे उद्घाटन हुने महाधिवेशन नयाँ नेतृत्व चयन र विराटनगर घोषणा पत्र जारी गर्दै समापन हुनेछ ।
चौतारीको अध्यक्षका लागि वर्तमान उपाध्यक्ष गणेश पाण्डे र राजेश राईले उम्मेदवारी घोषणा गरिसकेका छन् । पाण्डेलाई पार्टी अध्यक्ष केपी शर्मा ओलीकाे समर्थन छ । राईलाई अन्य नेताले समर्थन गरेका छन् । नयाँ नेतृत्वका लागि सहमति नभए निर्वाचन हुनेछ ।
























