आन्दोलनरत शिक्षकलाई विद्यालय फर्किन योगेश भट्टराईको आग्रह

Share this
726shares
मुलुकी खबर
मुलुकी खबर
clock२०८१ चैत २५, सोमबार १३:०५

विराटनगर । नेकपा (एमाले)का सचिव एवं ताप्लेजुङबाट निर्वाचित प्रतिनिधिसभा सदस्य योगेश भट्टराईले आन्दोलन बिसाएर विद्यालय फर्किन शिक्षकहरुलाई आग्रह गरेका छन् ।

शिक्षकहरुले राखेका मागमा सरकार र सरकारमा रहेका दलहरु संवेदनशील रहेको स्मरण गराउँदै उनले भने, ‘विद्यालय र आफ्नो गाउँ फर्किएर शैक्षिक क्रियाकलापलाई नियमित रूपमा अघि बढाउन म उहाँहरुलाई विनम्रतापूवर्क अपिल गर्दछु ।’ विराटनगर विमानस्थलमा सोमबार मुलुकी खबरसँग संक्षिप्त कुराकानी गर्दै नेता भट्टराईले विद्यालय शिक्षा विधेयकलाई संसदको आगामी बर्खे एवं बजेट अधिवेशनमा अघि बढाइने जानकारी दिए ।

‘उहाँहरु (शिक्षक)ले भनेजस्तो विधेयक संसदको आगामी अधिवेशन सुरु भएको १ हप्ताभित्र प्रस्तुत गर्छौं । प्रतिनिधिसभा र राष्ट्रियसभा दुवै सदनबाट ऐनका रूपमा पारित गराउँछौं,’ उनले भने, ‘अहिले शैक्षिक क्षेत्रलाई अन्योलमा पारेर शिक्षकहरु सडकमा आइरहनुपर्ने अवस्था हैन । उहाँहरुले चाँडो गरेर वार्तामा बस्नुपर्छ ।’ एमाले सचिव भट्टराईले लोकतान्त्रिक गणतन्त्र ल्याउन शिक्षकहरुको ठूलो भूमिका रहेको स्मरण गरे ।

‘लोकतान्त्रिक गणतन्त्र ल्याउन उहाँहरुको ठूलो भूमिका छ । अहिले व्यवस्था र संविधानमाथि धावा बोलिरहेका बेला शिक्षकहरु पनि सडकमा आएर थप दबाब र अन्योलता सिर्जना गर्ने कुरा त्यति उचित हुँदैन । थाइल्याण्ड भ्रमणबाट फर्किनेवित्तिकै प्रधानमन्त्रीले सकारात्मक धारणा दिइसक्नु भएको छ । शिक्षकको मागप्रति संसदमा भएका सबै दलहरु सकारात्मक छन् । छिटोभन्दा छिटो विधेयक पास गर्नुपर्छ भन्नेमा कुनै दुईमत छैन,’ उनले भने ।

विधेयकलाई छिटो टुंग्याउँदै संसदबाट पास गराउनुपर्ने लगायतका माग राखेर नेपाल राष्ट्रिय शिक्षक महासंघको आह्वान र विभिन्न शिक्षक संघ संगठनसमेतको सहभागितामा शिक्षकहरुले आन्दोलन अगाडि बढाइरहेका छन् । शिक्षकले गरिरहेको काठमाडौं केन्द्रित आन्दोलनप्रति सरकार र सरकारमा रहेका दलहरु संवेदनशील रहेको भट्टराईले बताए ।

‘शिक्षकको आन्दोलतप्रति सरकार र विभिन्न पार्टीहरुको गम्भीर ध्यानाकर्षण भएको छ । उहाँहरुको माग जायज छन् । ऐन चाँडै बनाउनुपर्ने थियो । तर, ढिलाइ भएकाले प्रदेश र स्थानीय तहले पनि ऐन बनाउन पाएनन् । शिक्षकहरुको वृत्ति विकास र पदोन्नतिका कुराहरु पनि छन्,’ उनी भन्छन् । उनले सत्तारुढ दलका तर्फबाट शिक्षकहरुसँग पटकपटक अनौपचारिक संवाद गरिएको जानकारी दिए ।

सरकारले छलफलमा बोलाइसकेको भन्दै भट्टराईले वार्ताबाट समस्याको समाधान खोज्न पनि शिक्षकहरुलाई आग्रह गरे । ‘सरकारले उहाँहरुलाई छलफलमा बोलाएको छ । तर, छलफलमा आउन मानिरहनु भएको छैन । यस्तो बेलामा सरकारसँग संवाद र कुराकानी नगर्ने भन्ने कुरा त्यति राम्रो हैन । हामीले अनौपचारिक च्यानलबाट उहाँहरुलाई त्यो सन्देश पठाइसकेका छौं । जेसुकै कारणले भएपनि विद्यालय शिक्षा विधेयक पास गर्न ढिला भइसक्यो । अहिलेसम्म विभिन्न सरकारले त्यो कमीकमजोरीको जिम्मा लिनुपर्छ । अब विधेयक अघि बढाउने कुरामा कुनै ढिला हुने छैन,’ उनी भन्छन् ।

सरकारले पेस गरेको विधेयक सैद्धान्तिक छलफल भएर शिक्षा समितिमा गइसकेको र समितिमा दफावार छलफल चलिरहेको जानकारी उनले दिए । ‘अहिले संसद चलेको छैन । संसद सुरु भएको १ हप्ताभित्र विधेयक अघि बढ्छ । यो हाम्रो प्रतिबद्धता भयो,’ भट्टराईले भने ।

विगतमा २०७२ सालपछि शिक्षकहरुसँग पटकपटक सहमति भएको भन्दै उनले विधेयकलाई टुंगोमा पुर्याउँदा शिक्षकहरुसँग भएका सहमति र सम्झौतालाई पनि आधार बनाइने प्रतिबद्धता जनाए । ‘जुनसुकै सरकारले सहमति गरेको भए पनि लोकतान्त्रिक विधिमा सरकार भनेको अविछिन्न उत्तराधिकारीवाला संस्था हो । हिजोका सरकारले गरेका सहमतिलाई आजको समय सन्दर्भसहित आधार मानेर विद्यालय शिक्षा विधेयक अघि बढाइने छ । नेपालको संविधानदेखि विश्वभरि चलेका शिक्षा सम्बन्धी प्रावधानलाई पनि आधार बनाइने छ,’ भट्टराई भन्छन् ।

यो अलि जटिल विधेयक भएको उनको भनाइ छ । ‘विधेयकमाथि १६० जनाभन्दा बढी सांसदको संशोधन परेको छ । सबै संशोधनलाई पनि हेर्नुपर्ने हुन्छ,’ उनी भन्छन्, ‘कानुन भनेको १–२ वर्षाका लागि बनाइने हैन । हामीले बनाउँछौं भनिसकेपछि शिक्षकहरुले त्यसलाई अन्यथा लिनु पर्दैन ।’

वैशाख २ गतेबाट विद्यालयमा नयाँ भर्ना प्रक्रिया सुरु हुने बताउँदै उनले त्यसलाई सहज ढंगले अघि बढाउन शिक्षकहरुलाई आग्रह गरेका छन् । ‘नयाँ ‘रिजल्ट’ निकाल्ने बेला भएको छ । एसईईका उत्तर पुस्तिका परीक्षण गरेर चाँडोभन्दा चाँडो रिजल्ट निकाल्नुपर्ने हुन्छ । यी कामहरु छाडेर शिक्षक साथीहरु सडकमा आउनु भयो । अब उहाँहरु फर्किनुपर्छ । ‘रिजल्ट’ निकाल्ने कुरामा सहभागी हुनुपर्छ । सरकारसँग वार्ता गरेर शिक्षा विधेयकलाई छिटोभन्दा छिटो अगाडि बढाउन भूमिका खेल्नुपर्छ,’ एमाले नेता भट्टराईको आग्रह छ ।

तपाइको प्रतिक्रिया
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
भन्सार छली सुन लैजान खोज्ने चिनियाँ नागरिक पक्राउ
खराब मौसमले विराटनगरका बिहानका सबै उडान रद्द, सयौँ यात्रु प्रभावित
इनम सापकोटा प्रकरणमा सरकारको अनुसन्धानमाथि पोखरेलको प्रश्न
कनकाईमा आगजनीबाट दुई कुन्यूको धान र पराल नष्ट
© 2024 Muluki Khabar. All Rights Reserved. Design & Develop By: Indesign Media Pvt. Ltd.