चितवनमा औलोका बिरामी भेटिए

काठमाडौं । चितवनमा औलो (मलेरिया)का बिरामी भेटिएका छन् । चालु आर्थिक वर्षमा चितवनको विभिन्न स्थानमा ७ जना औलो रोगका बिरामी भेटिएका हुन् ।

जिल्ला जनस्वास्थ्य कार्यालय चितवनका भेक्टर कन्ट्रोल निरीक्षक राम केसीका अनुसार औलो रोग सङ्क्रमणको आशंकामा उपचारका लागि आएका ७ हजार ९ सय ८९ जनाको नमुना परीक्षण गर्दा ७ जनामा सङ्क्रमण देखिएको जानकारी दिए ।

Advertisement

उनले यसरी सङ्क्रमण देखिनेमा वैदेशिक रोजगारीबाट फर्किएकोमा रहेको बताए । गत आर्थिक वर्षमा १० जनामा उक्त रोगको सङ्क्रमण देखिएको थियो ।

पन्ध्र वर्ष उमेरभन्दा बढीमा यो रोग देखिएको उनले बताए । यो रोग एनोफलिज जातको लाम्खुट्टेले टोक्दा हुने गर्दछ । रोग लाग्दा ज्वरो आइरहने वा दिन बिराएर ज्वरो आउने, टाउको बेस्सरी दुख्ने, वान्ता हुने, जाडो हुने, कम्पन छुट्ने, पसिना आएर ज्वरो घट्ने लक्षण देखिने गरेको छ।

अहिले औलो रोग निवारण गर्ने गरी कार्यक्रम सञ्चालन हुँदै आएको छ । नेपालमा पी भाइभाक्स परजीवी ७० देखि ८० प्रतिशत देखिने गरेको छ। विदेशबाट आउने नेपालीमा पी फाल्सीपारम परजीवी भेटिने गरेको उनले बताए ।

औलो सङ्क्रमित लाम्खुट्टेको टोकाइबाट यो रोग सर्दछ । घर गाउँ र समुदाय सफा राखी लाम्खुट्टेले फूल पार्ने ठाउँलाई पुर्ने, सुत्दा झुलभित्र सुत्ने जस्ता कार्य गर्नु आवश्यक रहेको छ ।