
काठमाडौं । नेपाल प्रहरीका नवनियुक्त महानिरीक्षक चन्द्रकुवेर खापुङले बिहीबार (आज) दर्ज्यानी चिह्न लगाएका छन् ।
खापुङलाई गृह मन्त्रालयमा आयोजित कार्यक्रममा गृह सचिव गोकर्णमणि दुवाडीले दर्ज्यानी चिह्न लगाइदिए । दर्ज्यानी चिह्न लगाएपछि उनले आजै प्रहरी प्रधान कार्यालय नक्साल पुगेर पदभार ग्रहण गर्ने छन् ।
निवर्तमान प्रहरी महानिरीक्षक दीपक थापाले भदौ १८ गते राति १२ बजेदेखि अवकाश पाएपछि खापुङले आजबाट नेपाल प्रहरीको कमान्ड सम्हालेका हुन् ।
भदौ १३ गतेको मन्त्रिपरिषद् बैठकले खापुङलाई भदौ १९ गतेदेखि लागू हुने गरी नेपाल प्रहरीको सर्वोच्च पदमा नियुक्त गर्ने निर्णय गरेको थियो ।
उनको पालामा पनि नयाँ प्रहरी ऐन जारी भए उनको सेवा अवधिमा अहिलेको प्रावधान अनुसार ६ महिना थपिने छ । नभए उनी पनि ३० वर्षे सेवा अवधिका कारण कात्तिक २६ गते राति १२ बजेबाट अनिवार्य अवकाशमा जाने छन् ।























