सास्थम कलेजमा बीबीए र बीएचएमका नवप्रवेशी विद्यार्थीलाई स्वागत

विराटनगर । विराटनगरस्थित साउथ एसियन स्कूल अफ टुरिज्म एण्ड होटल म्यानेजमेन्ट (सास्थम) कलेजले बीबीए र बीएचएमका नयाँ विद्यार्थीहरूलाई एक समारोहका बीच स्वागत गरेको छ । कलेज परिसरमा आयोजित कार्यक्रम पूर्वाञ्चल विश्वविद्यालय व्यवस्थापन संकायका डिन डा. सन्देश दास श्रेष्ठको प्रमुख आतिथ्यतामा सम्पन्न भयो ।

कार्यक्रममा प्रमुख अतिथि डा. श्रेष्ठले विद्यार्थीहरूलाई अनुशासन, सीप विकास र व्यवहारिक ज्ञानमा जोड दिन आग्रह गरे । पर्यटन तथा आतिथ्य व्यवस्थापनमा दक्ष जनशक्ति उत्पादन गर्न सास्थमले पूर्वाञ्चल क्षेत्रमै अग्रणी भूमिका खेलेको उनको भनाइ थियो ।

Advertisement

स्वागतका क्रममा कलेजका पुराना विद्यार्थीहरूले सांस्कृतिक नृत्य, फेसन र्याम्प र गीत संगीतका माध्यमबाट मनोरञ्जन प्रदान गरेका थिए । यस शैक्षिक सत्रमा कलेजमा विद्यार्थीको आकर्षण निकै देखिएको छ । क्याम्पस प्रमुख विनय केसीका अनुसार बीएचएमको २२औँ ब्याचमा १४४ र बीबीएको १७औँ ब्याचमा ९६ जना नयाँ विद्यार्थी भर्ना भएका छन् । कलेजले यसै वर्षदेखि एमएचएचएम कार्यक्रम पनि सुरु गरेको छ ।

कार्यक्रममा कलेजका प्रबन्ध निर्देशक रोशन बहादुर थापा, क्याम्पस प्रमुख विनय केसी, प्रशासन प्रमुख राजेश गुरुङसहित विभिन्न कार्यक्रमका निर्देशक र शैक्षिक संयोजकहरूको उपस्थिति थियो ।