
विराटनगर । पोखराबाट काठमाडौं जाँदै गरेको ग२ख १४२१ नम्बरको यात्रुवाहक बस सोमबार बिहान करिब १:३० बजे धादिङको बेनीघाट रोराङ–५ स्थित भैँसीगौँडामा दुर्घटना हुँदा १९ जनाको मृत्यु भएको छ। बस सडकबाट दुई सय मिटर तल खसेको थियो। मृतकहरूमध्ये बेलायती, चिनियाँ र भारतीय गरी तीन विदेशी नागरिक समेत छन्। ४४ जना सवार उक्त बसमा २५ जना घाइते भएका छन्, जसको उपचार काठमाडौँका विभिन्न अस्पतालमा भइरहेको छ।
पछिल्लो समय नेपालका राजमार्गहरूमा ठूला सवारी दुर्घटनाको लहर नै चलेको छ। गत २७ माघमा रामेछापको मन्थलीमा तामाकोशी नदीमा बस खस्दा १२ जना र २२ माघमा बैतडीमा जन्ती बोकेको बस दुर्घटना हुँदा १३ जनाको मृत्यु भएको थियो। यी घटनाहरूले नेपालको सडक सुरक्षा र यातायात व्यवस्थापनमा रहेका गम्भीर खाडलहरू पुनः सतहमा ल्याइदिएका छन्।
नेपाल प्रहरीको तथ्याङ्क अनुसार विगत ८ वर्षमा मात्र १ लाख ६८ हजार ६ सय २३ सवारी दुर्घटना भएका छन्, जसमा १९ हजार २ सय ६२ जनाले ज्यान गुमाएका छन्। यसै आर्थिक वर्षको माघसम्म मात्रै १ हजार ५ सय ४५ जनाको मृत्यु भइसकेको छ। काठमाडौँ उपत्यका ट्राफिक कार्यालयका प्रमुख एसएसपी नवराज अधिकारीका अनुसार तीव्र गति, मादक पदार्थ सेवन, ओभरलोड र सडकको असुरक्षित बनावट दुर्घटनाका मुख्य कारण हुन्।
सवारी तथा यातायात व्यवस्था ऐन २०४९ ले लामो दूरीका सवारीमा दुई जना चालक अनिवार्य गरे पनि यो प्रावधान कागजमा मात्र सीमित छ। सवारीको यान्त्रिक अवस्था जाँच्ने ‘भेहिकल फिटनेस टेस्ट सेन्टर’ हरूको सङ्ख्या र प्रभावकारिता न्यून छ। सडक सुरक्षाविज्ञ डा. भगवती सेढाईंले तीव्र गति र चालकको थकानलाई प्रमुख जोखिम मान्दै नियमनकारी निकायको सुस्तताप्रति चिन्ता व्यक्त गरेकी छन्।
धादिङ दुर्घटनाको अनुसन्धानका लागि गृह मन्त्रालयले सहसचिव ऋषिराम तिवारीको नेतृत्वमा ६ सदस्यीय कार्यदल गठन गरी सात दिनभित्र प्रतिवेदन बुझाउन निर्देशन दिएको छ। निर्वाचनको समयमा यात्रुको चाप बढ्ने भएकाले थप सतर्कता अपनाउन र पुराना छानबिन कार्यदलका सुझावहरू कार्यान्वयन गर्न सरोकारवालाहरूले जोड दिएका छन्।
























