
काठमाडौं । नेकपा (एमाले) ले आगामी फागुन २१ गतेका लागि तय गरिएको प्रतिनिधिसभा निर्वाचन सार्ने गरी चलाइएको हल्लाप्रति आपत्ति जनाएको छ। मंगलबार पार्टी मुख्यालयमा आयोजित नियमित पत्रकार सम्मेलनमा एमालेको निर्वाचन प्रचारप्रसार समितिका संयोजक मीनबहादुर शाहीले निर्वाचन सार्ने कुनै पनि कुरामा एमाले सहमत नहुने स्पष्ट पारेका हुन्।
शाहीले निर्वाचनको मिति नजिकिँदै गर्दा भ्रम फैलाउन खोजिएको भन्दै त्यसतर्फ पार्टीको गम्भीर ध्यानाकर्षण भएको बताए। ‘अहिले निर्वाचन सर्ने जुन हल्ला चलाइएको छ, त्यसमा हाम्रो आपत्ति छ,’ उनले भने, ‘हामी पुनः दोहोर्याउन चाहन्छौँ- निर्वाचन समयमै हुनुपर्छ र त्यसका लागि एमाले पूर्ण रूपमा तयार छ।’ एमालेले कुनै पनि बहानामा निर्वाचनको मिति हेरफेर गर्नु लोकतान्त्रिक अभ्यास विपरीत हुने अडान लिएको छ।
संयोजक शाहीले कुन राजनीतिक उद्देश्यका साथ र कसको इशारामा चुनाव सार्ने हल्ला फैलाइँदै छ भनी प्रश्न समेत गरे। एमालेले यस्ता हल्लाहरूको भित्री उद्देश्य र षड्यन्त्रबारे गम्भीर चासो राखिरहेको उनले उल्लेख गरे। सरकार र निर्वाचन आयोगलाई कुनै पनि प्रभावमा नपरी निर्धारित मितिमै निष्पक्ष र धाधलीरहित निर्वाचन गराउन एमालेले माग गरेको छ।

























