
काठमाडौं । आगामी फागुन २१ गते हुने प्रतिनिधिसभा निर्वाचनमा प्रतिस्पर्धा गरिरहेका महिला उम्मेदवारहरूको विवरण सार्वजनिक गर्न माग गर्दै सर्वोच्च अदालतमा दायर रिटको प्रारम्भिक सुनुवाइका लागि आज पेसी तोकिएको छ। न्यायाधीश अब्दुल अजिज मुसलमानको एकल इजलासमा उक्त रिटमाथि सुनुवाइ हुन लागेको हो।
अधिवक्ता राजकुमार सुवालले बुधबार निर्वाचन आयोगलाई विपक्षी बनाउँदै उक्त रिट दायर गरेका थिए। रिटमा विशेषगरी विदेशी पुरुषसँग विवाह गरेका महिला उम्मेदवारहरूको प्रत्यक्ष र समानुपातिक दुवैतर्फको सूची सार्वजनिक गर्न माग गरिएको छ। आयोगले उम्मेदवारहरूको पारिवारिक र व्यक्तिगत विवरण पारदर्शी नगर्दा झुटो विवरण दिनेहरू विरुद्ध उजुरी गर्ने बाटो बन्द भएको दाबी रिटमा गरिएको छ।
‘मतदाता नामावली ऐन, २०७३’ अनुसार कसैले झुटो विवरण दिएर नाम समावेश गरेको पाइएमा जोसुकैले पनि उजुरी दिन सक्ने कानुनी व्यवस्था छ। सोही व्यवस्थालाई टेकेर अधिवक्ता सुवालले निर्वाचनमा उम्मेदवार बनेका महिलाहरूको वैवाहिक र व्यक्तिगत विवरण खुलाउनुपर्ने माग गरेका हुन्। अदालतले आजको सुनुवाइपछि आयोगका नाममा आदेश जारी गर्ने वा नगर्ने विषयमा निर्णय गर्नेछ।
























