
पाँचथर । आसन्न प्रतिनिधिसभा सदस्य निर्वाचनमा खटिएका कर्मचारी र उनीहरूको जिम्मेवारीलाई लिएर सामाजिक सञ्जालमा जथाभावी टिप्पणी नगर्न जिल्ला प्रशासन कार्यालय पाँचथरले निर्देशन दिएको छ। सरकारी कर्मचारी, शिक्षक तथा विद्यालय कर्मचारीहरूले आफ्नो पद, श्रेणी वा खटनपटन चित्त नबुझेको भन्दै फेसबुक जस्ता माध्यममा असन्तुष्टि पोखेपछि प्रशासनले यस्तो आग्रह गरेको हो।
प्रमुख जिल्ला अधिकारी बासुदेव दाहालले एक ध्यानाकर्षण पत्र जारी गर्दै निर्वाचन जस्तो संवेदनशील कार्यमा दिइएको जिम्मेवारीबारे सार्वजनिक मञ्चमा टिप्पणी गर्नु अनुशासनविपरीत हुने बताए। पत्रमा निर्वाचन प्रक्रियाका क्रममा साना-तिना प्राविधिक त्रुटि हुन सक्ने स्वीकार गरिएको छ, तर त्यसलाई अतिरञ्जित गरेर पोस्ट, सेयर, लाइक वा कमेन्ट गर्नुले निर्वाचन सम्पन्न गर्ने कार्यमा अवरोध पुग्ने उल्लेख गरिएको छ।
प्रशासनले कर्मचारीहरूलाई कुनै पनि गुनासो वा असहमति भएमा सम्बन्धित निकायमा लिखित वा मौखिक रूपमा जानकारी गराउन बाटो खुल्ला रहेको बताएको छ। निर्वाचन आचारसंहिता २०८२ र निर्वाचन आयोगको निर्देशिका विपरीत गतिविधि गरेमा प्रचलित कानुनअनुसार कारबाही गरिने चेतावनी समेत दिइएको छ।

























