
काठमाडौं । त्रिभुवन अन्तर्राष्ट्रिय विमानस्थलबाट ४८ थान राहदानीसहित एक महिला पक्राउ परेकी छन्। पक्राउ पर्नेमा नागार्जुन नगरपालिका–१ निवासी ४५ वर्षीया तारा चन्द चौधरी छन्। उनलाई विमानस्थल सुरक्षा कार्यालयले भुटान एयरलायन्सको उडानमार्फत दिल्ली जान लागेका बेला नियन्त्रणमा लिएको हो।
नियमित सुरक्षा जाँचका क्रममा चौधरीको झोलामा विभिन्न व्यक्तिका नाममा जारी गरिएका ४८ थान राहदानी फेला परेका थिए। यति धेरै संख्यामा अरूका राहदानी बोकेर विदेश जानुको उद्देश्य शङ्कास्पद देखिएपछि प्रहरीले उनलाई पक्राउ गरेको हो। प्रारम्भिक सोधपुछका क्रममा उनले ती राहदानीका बारेमा चित्तबुझ्दो जवाफ दिन नसकेको बुझिएको छ।
यस घटनाले वैदेशिक रोजगारीका नाममा हुने मानव तस्कर वा गैरकानुनी कागजात संकलनको गिरोह सक्रिय रहेको सङ्केत गरेको छ। पक्राउ परेकी चौधरीलाई थप अनुसन्धान र कानुनी कारबाहीका लागि काठमाडौँ उपत्यका अपराध अनुसन्धान कार्यालय पठाइएको छ। यति धेरै राहदानी उनले कहाँबाट र कसरी संकलन गरिन् भन्नेबारे प्रहरीले गहिरो अनुसन्धान सुरु गरेको छ।
























