
काठमाडौं । देशमा पश्चिमी न्यून चापीय प्रणालीको प्रभाव कायमै रहेको छ । जल तथा मौसम पूर्वानुमान महाशाखाका अनुसार हाल उपल्लो वायुमण्डलमा सक्रिय पश्चिमी प्रणालीका कारण विशेषगरी कोशी, बागमती र गण्डकी प्रदेशका पहाडी तथा हिमाली भू–भागमा मौसम बदली भएको छ ।
अन्य पहाडी तथा हिमाली क्षेत्रमा आंशिक बदलीको अवस्था छ । शुक्रबार (आज) बिहानैदेखि कोशी र बागमती प्रदेशका उच्च भू–भागका एक–दुई स्थानमा मेघगर्जन र चट्याङसहित हल्का वर्षा भइरहेको छ ।
उच्च हिमाली क्षेत्रमा हल्का हिमपातसमेत भएको महाशाखाले जनाएको छ । मौसमविद्हरूका अनुसार पश्चिमी न्यून चापीय प्रणालीको प्रभाव दिनभर आंशिक रूपमा कायम रहने सम्भावना छ ।
दिउँसो कोशी, बागमती र गण्डकी प्रदेशका पहाडी तथा हिमाली भू–भागमा साधारणतया बदली रहनेछ भने अन्य पहाडी क्षेत्रमा आंशिक बदली रहनेछ । तराई क्षेत्रमा भने मौसम मुख्यतया सफा रहने महाशाखाको भनाइ छ ।
कोशी, बागमती र गण्डकी प्रदेशका पहाडी तथा हिमाली भू–भागका थोरै स्थानमा तथा अन्य प्रदेशका उच्च भू–भागका एक–दुई स्थानमा मेघगर्जन र चट्याङसहित हल्का वर्षा र हिमपातको सम्भावना रहेको छ ।
रातको समयमा तराईका थोरै स्थानमा तुवाँलो लाग्ने अनुमान गरिएको छ । देशका अधिकांश हिमाली भू–भागमा साधारणतया बदली रहनेछ भने पहाडी क्षेत्रमा आंशिक बदली र तराई क्षेत्रमा मौसम मुख्यतया सफा रहनेछ ।
कोशी, गण्डकी र कर्णाली प्रदेशका हिमाली भू–भागका एक–दुई स्थानमा राति पनि मेघगर्जन र चट्याङसहित हल्का वर्षा र हिमपात हुन सक्ने पूर्वानुमान गरिएको छ । मौसमविद्हरूले पहाडी तथा हिमाली क्षेत्रमा यात्रा गर्नेहरूलाई सतर्कता अपनाउन र आवश्यक तयारीका साथ मात्रै आवतजावत गर्न आग्रह गरेका छन् ।

























