
इटहरी। आगामी फागुन २१ गते हुने प्रतिनिधिसभा निर्वाचन नजिकिँदै गर्दा कोशी प्रदेशमा राजनीतिक सरगर्मीसँगै सुरक्षा सक्रियता पनि बढेको छ। निर्वाचन बहिष्कार अभियानको नेतृत्व गरिरहेको क्रान्तिकारी कम्युनिस्ट पार्टी नेपालका दुई प्रभावशाली नेतालाई प्रहरीले इटहरीबाट पक्राउ गरेपछि यस क्षेत्रको वातावरण थप तातिएको छ।
पक्राउ पर्नेहरूमा पार्टीका १५ नम्बर ब्युरो इन्चार्ज सिताराम बुढाथोकी र ब्युरो सचिव डिल्ली बोहोरा छन्। कोशी प्रदेश प्रहरी कार्यालय, जिल्ला प्रहरी कार्यालय सुनसरी र इलाका प्रहरी कार्यालय इटहरीको संयुक्त टोलीले उनीहरूलाई शनिबार इटहरीस्थित पशुपति चोकबाट नियन्त्रणमा लिएको हो।
पक्राउलगत्तै पार्टीले कडा आपत्ति जनाएको छ। पार्टीका १६ नम्बर ब्युरो सचिव बिमल निरौलाले आफ्ना नेताहरूलाई घरमै बसिरहेको अवस्थामा विनाकारण पक्राउ गरिएको दाबी गर्दै विनासर्त तत्काल रिहाइको माग गरेका छन्। उनले यस कदमलाई राजनीतिक पूर्वाग्रहबाट प्रेरित भएको आरोप लगाउँदै आन्दोलनलाई थप सशक्त बनाइने चेतावनी दिएका छन्।
पार्टीले वर्तमान निर्वाचनलाई ‘अमेरिकी साम्राज्यवाद प्रायोजित’ र सुशीला कार्की नेतृत्वको सरकारलाई ‘कठपुतली’ भन्दै यस प्रक्रियाबाट मुलुकले निकास नपाउने दाबी गरेको छ। उनीहरूले राष्ट्रिय भेला आयोजना गरी संयुक्त सरकार गठनको माग गर्दै कोणसभा र मसाल जुलुस जस्ता कार्यक्रम गर्ने रणनीति सार्वजनिक गरेका छन्।
प्रहरीले यसबारे औपचारिक धारणा सार्वजनिक नगरे पनि निर्वाचन सुरक्षालाई ध्यानमा राख्दै सम्भावित अवाञ्छित गतिविधि नियन्त्रण गर्न सुरक्षा संयन्त्र सक्रिय बनाएको बुझिएको छ।

























