अर्किडले मनायो २६ औँ वार्षिकोत्सव तथा अभिभावक दिवस

विराटनगर । विराटनगरको अर्किड स्कुलले २६ औँ वार्षिकोत्सव तथा अभिभावक दिवस विभिन्न कार्यक्रमको आयोजना गरेर मनाएको छ ।

सो अवसरमा स्कुलले एमबीबीएसमा पूर्ण छात्रवृत्ति पाएका मञ्जिल दाहाल र इन्जिनियरिङमा पूर्ण छात्रवृत्ति पाएका अभिनव दत्तलाई सम्मान गर्‍यो । कार्यक्रममा विभिन्न विधामा उत्कृष्ट ठहरिएका विद्यार्थीहरूलाई सम्मानसमेत गरेको थियो ।

Advertisement

शिक्षा विकास तथा समन्वय इकाई मोरङका प्रमुख सालिकराम दाहालले विद्यार्थीलाई सीप संस्कारयुक्त शिक्षा दिनुपर्नेमा जोड दिए । विद्यालयका अध्यक्ष अमित ढकालले गुणस्तरीय शिक्षाकै कारण अर्किड स्कुल विद्यार्थी र अभिभावकको रोजाइमा पर्न सफल भएको बताए ।

विद्यालयका निर्देशक दीपेश बास्तोलाले विद्यार्थीहरूलाई उत्कृष्ट शैक्षिक वातावरण र गुणस्तरीय शिक्षा प्रदान गर्न विद्यालय सदैव कटिबद्ध भएर अगाडि बढिरहेको बताए ।

वार्षिकोत्सव तथा अभिभावक दिवस बोल्दै प्रिन्सिपल मनिष भट्टराईले विद्यालय भनेको भवन र कक्षाकोठाको नाम मात्र होइन यो सपनाहरू बन्ने थलो हो, भविष्य निर्माण गर्ने आधार भएको बताए । उनले शिक्षा केवल पाठ्यपुस्तकमा मात्रै सीमित नभई प्रविधिमैत्री र सीप केन्द्रित बन्दै गएकाले शिक्षण पद्धतिलाई विद्यार्थी केन्द्रित प्रयोगात्मक प्रविधिसँग जोडिएको बनाउने दिशामा निरन्तर प्रयास गरिरहेको प्रस्ट्याए ।

स्कुलले शैक्षिक गतिविधि सँगसँगै अतिरिक्त क्रियाकलापहरू खेलकुद, सांस्कृतिक कार्यक्रम, लिडरसिप, व्यक्तित्व विकास, सामाजिक उत्तरदायित्व जस्ता कार्यक्रममा विद्यार्थीलाई प्रत्यक्ष जोड्दै लगेको उनले बताए । घर र विद्यालयबीचको सहकार्यले मात्र विद्यार्थीको समग्र विकास सम्भव हुने प्रिन्सिपल भट्टराईले बताए ।

सो अवसरमा हिसानका केन्द्रीय सचिव राजेश कार्की, स्कुलका संस्थापक सदस्य बलराम पन्त, प्याब्सन विराटनगरका अध्यक्ष अर्जुन श्रेष्ठलगायतले स्कुलले शैक्षिक क्षेत्रमा पुर्‍याएको योगदानको चर्चा गर्दै आगामी दिनका लागि सफलताको शुभकामना दिएका थिए ।

वार्षिकोत्सव तथा अभिभावक दिवसमा विद्यार्थीहरूले अभिनय, नृत्य, गायनलगायतका कला, प्रतिभा प्रस्तुत गरेका थिए ।