
काठमाडौं । आगामी बिहीबारको प्रतिनिधिसभा सदस्य निर्वाचनका लागि मतदानको तयारी पूरा भएको निर्वाचन आयोगले जनाएको छ ।
आयोगका प्रवक्ता नारायणप्रसाद भट्टराईले आयोगको तर्फबाट गर्नुपर्ने सबै प्रशासनिक, प्राविधिक तथा व्यवस्थापकीय काम सकिएको जानकारी दिए । उनका अनुसार मतदान केन्द्र तोक्ने, केन्द्रको हाता निर्धारण गर्ने, निषेधित क्षेत्र घोषणा गर्ने र आवश्यक सूचना टाँस्ने काम सम्पन्न भइसकेको छ ।
मतदान सामग्री सम्बन्धित केन्द्रमा पुर्याइसकिएको र कर्मचारीसमेत खटाइसकिएको उनले बताए । अहिले जिल्ला तथा मतदान केन्द्र तहबाट आएका जिज्ञासा र समस्याहरू समाधान गर्ने काम भइरहेको छ ।
निर्वाचनमा ५ हजारभन्दा बढी पर्यवेक्षक परिचालन हुनेछन् । विदेशी प्रतिनिधिहरूलाई सहजीकरण गरिसकिएको आयोगले जनाएको छ । मौन अवधि जारी रहेकाले आचारसंहिता उल्लंघनका घटनामा कानुनअनुसार कारबाही भइरहेको प्रवक्ता भट्टराईले बताए ।
सुरक्षातर्फ सरकारसँग समन्वय गरी भरपर्दो व्यवस्था मिलाइएको आयोगको दाबी छ । उनले मतदातालाई मत बदर नहुने गरी स्वस्तिक छाप स्पष्ट रूपमा सम्बन्धित चिन्हभित्र मात्र लगाएर मतदान गर्न आग्रह गरेका छन् ।

























