
काठमाडौं । भक्तपुरको चाँगुनारायण नगरपालिका–८ बागेश्वरी भवनअगाडि कार दुर्घटना हुँदा तीन जनाको मृत्यु भएको छ ।
नगरकोटबाट काठमाडौंतर्फ आउँदै गरेको बा ५ च ७८८१ नम्बरको निजी कार सोमबार अनियन्त्रित भई करिब ५० मिटर तल खसेर दुर्घटना हुँदा पाँच जना घाइते भएका थिए । उपत्यका ट्राफिक प्रहरी कार्यालयका एसएसपी नवराज अधिकारीका अनुसार घाइतेमध्ये कार चालक ५५ वर्षीय योगेन्द्र प्रधान, कारमा सवार ४८ वर्षीय सुरेन्द्र प्रधान र ५५ वर्षीया कृष्णा प्रधानको उपचारका क्रममा मृत्यु भएको हो ।
दुर्घटनामा घाइते भएका ४५ वर्षीया अनिता प्रधान र ४९ वर्षीया जयदेवी प्रधानको उपचार भइरहेको छ । प्रहरीले दुर्घटनाको कारण पत्ता लगाउन अनुसन्धान गरिरहेको छ ।

























