
काठमाडौं । नेपालमा हाल उपल्लो वायुमण्डलमा उच्च चापीय प्रणालीको प्रभाव कायम रहेको मौसम पूर्वानुमान महाशाखाले जनाएको छ ।
महाशाखाका अनुसार यस प्रणालीका कारण देशका विभिन्न भू–भागमा मौसमको अवस्था फरक–फरक रहने छ । आज (बुधबार) दिउँसो कोशी, बागमती र गण्डकी प्रदेशका पहाडी तथा हिमाली क्षेत्रमा आंशिक बदली रहनेछ ।
बाँकी भू–भागमा भने मौसम मुख्यतया सफा रहने जनाइएको छ । तराई क्षेत्रका केही स्थानमा हुस्सु लाग्ने सम्भावना रहेको छ । जसले बिहानको समयमा दृश्यता घटाउन सक्छ ।
राति पनि मौसममा खासै परिवर्तन नआउने पूर्वानुमान छ । कोशी र गण्डकी प्रदेशका पहाडी तथा हिमाली भू–भागमा आंशिक बादल कायम रहनेछ भने अन्य स्थानमा मौसम सामान्यतया सफा रहनेछ । तराईका थोरै स्थानमा तुवाँलो लाग्ने सम्भावना रहेको महाशाखाले जनाएको छ ।
उच्च चापीय प्रणाली सक्रिय रहँदा सामान्यतया मौसम स्थिर रहने, वर्षा नहुने र बिहान बेलुका चिसोको अनुभूति बढ्ने सम्भावना रहन्छ । विशेषगरी तराई क्षेत्रमा बिहानको हुस्सु र रातिको तुवाँलोका कारण सवारीसाधन चलाउँदा सावधानी अपनाउन आग्रह गरिएको छ ।
























