कोशी प्रदेशमा मतदान सम्पन्न गर्न साढे २५ हजार बढी कर्मचारी परिचालन

Share this
771shares
मुलुकी खबर
मुलुकी खबर
clock२०८२ फागुन २०, बुधबार १३:५९

विराटनगर । कोशी प्रदेशमा प्रतिनिधिसभा निर्वाचनको बिहीबार हुने मतदान सम्पन्न गर्नका लागि साढे २५ हजार जनाभन्दा बढी कर्मचारी परिचालन गरिएको छ ।

मतदान अधिकृत, सहायक मतदान अधिकृत, सहायक र सहयोगी गरेर २५ हजार ७ सय ६४ जना कर्मचारी परिचालन गरिएको प्रदेश निर्वाचन कार्यालय विराटनगरले जनाएको छ । कार्यालयका अनुसार कोशी प्रदेशमा १ हजार ९ सय ७ मतदानस्थल र ४ हजार २ सय ७० मतदान केन्द्र छन् ।

अस्थायी मतदानका लागि २४ वटा केन्द्र तोकिएको छ । अस्थायी मतदान केन्द्र स्थापना गरेर कारागार, वृद्धाश्रम तथा विशेष सुरक्षा व्यवस्थाभित्र रहेका विशेष परिस्थितिका मतदातालाई मतदानको अवसर सुनिश्चित गरिएको हो ।

स्थायी र अस्थायी गरेर मतदान केन्द्र ४ हजार २ सय ९४ छन् । प्रत्येकमा मतदान अधिकृत, सहायक मतदान अधिकृत र सहयोगी कर्मचारी गरेर १–१ जना तथा सहायक कर्मचारी ३ जना परिचालन गरिएको प्रदेश निर्वाचन कार्यालयका प्रमुख चोलाराज दंगालले बताए ।

उनका अनुसार केन्द्रमा अधिकृत र सहायक अधिकृत ८ हजार ५ सय ८८ जना खटाइएको छ । सहायक कर्मचारी १२ हजार ८ सय ८२ र सहयोगी कर्मचारी ४ हजार २ सय ९४ जना खटिएका छन् ।

निर्वाचनसँग सम्बन्धित काम कारबाहीकाका लागि मुख्य निर्वाचन अधिकृत र निर्वाचन अधिकृत १४–१४ तथा सहायक निर्वाचन अधिकृत २८ जना यसअघि नै नियुक्त गरिएको थियो । सबै मतदानस्थल र केन्द्रमा आवश्यक सुरक्षाकर्मी पनि परिचालन भइसकेका छन् ।

१४ जिल्ला रहेको कोशी प्रदेशमा २८ वटा निर्वाचन क्षेत्र छन् । ४ सय ९५ उम्मेदवार चुनावी मैदानमा छन् ।

प्रदेशमा निर्वाचनको सबै तयारी पूरा भएको दंगालले बताए । मतदान केन्द्र निर्माण र आवश्यक व्यवस्थापनको कार्य पूरा भइसकेकाले बिहीबार बिहानैबाट मतदान प्रक्रिया सुरु हुने उनको भनाइ छ ।

निर्वाचनको लागि आवश्यक मतपेटिका, मतपत्र, कर्मचारी तथा सुरक्षाकर्मी परिचालन र मतदान केन्द्रमा आवश्यक सामग्री ढुवानीको काम मंगलबार नै सकिएको थियो । सबै मतदाताले सुरक्षित र व्यवस्थित वातावरणमा मतदान गर्न पाउने वातावरण बनेको दंगालले बताए ।

निर्वाचनलाई शान्तिपूर्ण र भयरहित बनाउने उद्देश्यले सुरक्षा निकायले विशेष रणनीति अपनाउँदै सुरक्षा व्यवस्थालाई प्रभावकारी बनाएको छ । कोशीका मतदानस्थलमध्ये सुरक्षाको दृष्टिकोणले ४ सय ३९ ‘अतिसंवेदनशील’, ८ सय २१ ‘संवेदनशील’ र ६ सय ४७ वटालाई ‘सामान्य’ भनेर वर्गीकरण गरिएको छ ।

सुरक्षा सुदृढ गर्न नेपाली सेनाले पनि सक्रिय भूमिका खेलिरहेको छ । सबै जिल्लाका १ सय २० स्थानमा सेनाको बम डिस्पोजल टोली तैनाथ गरिएको छ । सेनाले सम्भावित विस्फोटक पदार्थ, शंकास्पद वस्तु तथा गतिविधि नियन्त्रणका लागि उच्च सतर्कता अपनाएको छ ।

मतदानको सुरक्षा व्यवस्था मिलाउन र भयरहित हिसाबले मतदान गर्ने वातावरण बनाउन संयुक्त सुरक्षा गस्ती, चेकजाँच र निगरानीलाई बढाइएको प्रदेश प्रहरी प्रमुख डीआईजी विनोद घिमिरेले बताए । कोशीमा ३५ लाख ७४ हजार ३ सय १० मतदातामध्ये १७ लाख ४६ हजार ७३ महिला, १८ लाख २८ हजार २ सय १३ पुरुष र २४ जना अन्य छन् ।

सबै निर्वाचन क्षेत्रमा मतगणनास्थल तयार भइसकेका छन् । तारजाली लगाएर व्यवस्थित र सुरक्षित हिसाबले मतगणनास्थल तयार पारिएको हो । बिहीबार मतदानपछि मतगणना सुरु गर्ने तयारी छ ।

डीआईजी घिमिरेले कुनै पनि डर र त्रार बिना मतदाताले निर्धक्क भएर सुरक्षितसाथ मतदान गर्ने वातावरण बनाइएको जानकारी दिए । प्रशासन, सुरक्षालगायत व्यवस्थापनसँग सम्बन्धित सबै तयारी पूरा भइसकेकाले मतदातालाई मतदानमा कुनै समस्या नहुने उनले बताए ।

तपाइको प्रतिक्रिया
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
भन्सार छली सुन लैजान खोज्ने चिनियाँ नागरिक पक्राउ
© 2024 Muluki Khabar. All Rights Reserved. Design & Develop By: Indesign Media Pvt. Ltd.