
भक्तपुर । पूर्वप्रधानमन्त्री एवं नेकपा (एमाले) का अध्यक्ष केपी शर्मा ओलीले भक्तपुरको बालकोटस्थित महेन्द्र शान्ति विद्यालय मतदान केन्द्रबाट आफ्नो मताधिकार प्रयोग गरेका छन्। पत्नी राधिका शाक्यसहित मतदानस्थल पुगेका ओलीले आज बिहानै मतदान गरेका हुन्।
प्रतिनिधि सभा निर्वाचनका लागि झापा क्षेत्र नम्बर ५ बाट उम्मेदवार रहेका ओली र सोही क्षेत्रका अर्का उम्मेदवार बालेन शाहले भने यसपटक आफूलाई मत दिन पाउने छैनन्। दुवैको मतदाता नामावली काठमाडौँ र भक्तपुरमा रहेका कारण उनीहरूले आफ्नो क्षेत्रमा मतदान गर्न नपाएका हुन्।
यसैबीच निर्वाचन आयोगले देशभरको मतदानको पछिल्लो अवस्था सार्वजनिक गरेको छ। आयोगका अनुसार आज बिहान ७ बजेदेखि सुरु भएको मतदानमा दिउँसो १२ बजेसम्म देशभर समग्रमा १८ प्रतिशत मात्र मत खसेको छ।
काठमाडौँमा २५ प्रतिशत मत खसेको तथ्याङ्क सार्वजनिक भए पनि देशभरको औसत प्रतिशत भने केही कम देखिएको छ। आयोगले दिउँसोको समयमा मतदाताको उपस्थिति बढ्ने र मतदानको दरमा वृद्धि हुने अपेक्षा गरेको छ।

























