
संखुवासभा । मतपेटिका सङ्कलनमा भौगोलिक विकटताका कारण केही ढिलाइ भएपछि संखुवासभामा आज शनिबार दिउँसो १२:१५ बजेदेखि मतगणना सुरु हुने भएको छ। जिल्लाका सबै १६५ मतदान केन्द्रहरूबाट मतपेटिका मुख्य निर्वाचन अधिकृतको कार्यालयमा ल्याइएपछि गणनाको बाटो खुलेको हो।
मुख्य निर्वाचन अधिकृत राजकुमार कोइरालाका अनुसार आज बिहानसम्म सबै मतपेटिका सुरक्षित रूपमा सङ्कलन गरिसकिएको छ। किमाथाङ्का जस्ता दुर्गम क्षेत्रहरूबाट हेलिकोप्टरमार्फत मतपेटिका ल्याइएको थियो।
मतगणना पूर्व सम्पन्न सर्वदलीय बैठकले दिउँसो सवा १२ बजेदेखि गणना कार्य अघि बढाउने सहमति गरेको छ। जिल्लामा एक लाख १९ हजार ६३० मतदाता रहेका छन् भने शान्तिपूर्ण रूपमा मतदान सम्पन्न भएको थियो।
























