
बुटवल। नेकपा (एमाले) को बलियो गढ मानिने रुपन्देही निर्वाचन क्षेत्र नम्बर २ मा राष्ट्रिय स्वतन्त्र पार्टी (रास्वपा) ले ठूलो उलटफेर गरेको छ। रास्वपाका उम्मेदवार सुलभ खरेलले एमालेका हेभिवेट नेता तथा उपाध्यक्ष विष्णु पौडेललाई भारी मतान्तरले पराजित गर्दै जित हासिल गरेका छन्।
निर्वाचन आयोगको अन्तिम प्रतिवेदन अनुसार खरेलले ५६ हजार ५५० मत प्राप्त गरी विजयी भएका हुन्। उनका निकटतम प्रतिद्वन्द्वी विष्णु पौडेलले मात्र १२ हजार ८६१ मत प्राप्त गरे। खरेलले पौडेललाई ४३ हजार ६८९ को विशाल मतान्तरले पछाडि पारेका हुन्, जुन यस क्षेत्रको इतिहासमै दुर्लभ मानिन्छ।
यस क्षेत्रमा नेपाली कांग्रेसका उम्मेदवार चुन्नप्रसाद पौडेल ९ हजार ३९२ मतका साथ तेस्रो स्थानमा रहेका छन् भने नेपाली कम्युनिष्ट पार्टीका सुवास पाण्डेले १ हजार ४०९ मत प्राप्त गरेका छन्। लामो समयदेखि यसै क्षेत्रबाट निर्वाचित हुँदै आएका विष्णु पौडेलको यो पराजयलाई एमालेका लागि ठूलो राजनीतिक धक्काका रूपमा हेरिएको छ।

























