
ओखलढुंगा। प्रतिनिधि सभा निर्वाचनको सार्वजनिक मतपरिणामप्रति नेपाली कांग्रेसका उम्मेदवार कुमार लुइँटेलले गम्भीर प्रश्न उठाएका छन् ।
निर्वाचन अधिकृतको कार्यालयले राष्ट्रिय स्वतन्त्र पार्टी (रास्वपा) का उम्मेदवार एवं नेपाल प्रहरीका पूर्व एआईजी विश्वराज पोखरेललाई ५ मतको झिनो अन्तरले विजयी घोषणा गरी प्रमाणपत्र समेत दिइसकेको अवस्थामा लुइँटेलले तथ्यांकमा कैफियत रहेको दाबी गरेका हुन् ।
मतदानपछि तयार पारिएको मुचुल्कामा ५९ हजार ७७ मत खसेको उल्लेख भए पनि आइतबार मतगणना सकिँदा सदर र बदर गरी कुल ५८ हजार ८९१ मत मात्र भेटिएको लुइँटेलको भनाइ छ ।
मुचुल्काको तुलनामा १८६ मत कम देखिएपछि उनले निर्वाचन आयोगको घोषणामाथि आशंका व्यक्त गर्दै कानूनी उपचारमा जाने तयारी गरेका छन् ।
मुख्य निर्वाचन अधिकृत हरिप्रसाद कोइरालाले भने सबै दलका प्रतिनिधिहरूकै रोहबरमा रुजु गरेर गणना गरिएकाले कुनै त्रुटि नभएको दाबी गरेका छन् ।
उनले मतपरिणाम घोषणा भइसकेकाले चित्त नबुझ्ने पक्षलाई कानूनी बाटो रोज्न सुझाव दिएका छन् । आयोगका अनुसार जिल्लाका विभिन्न गाउँपालिका र नगरपालिकाबाट खसेको मत जोड्दा ५९ हजार ७७ पुगे पनि गणनाको अन्तिम तथ्यांकले विवाद निम्त्याएको हो ।
























