सिद्धार्थ स्कुलको ३१ औं वार्षिकोत्सव, विद्यार्थी पुरस्कृत

विराटनगर । मोरङको सुन्दरहरैचा–१० खोर्सानेस्थित सिद्धार्थ सेकेण्डरी स्कुलले आफ्नो ३१ औं वार्षिकोत्सव तथा अभिभावक दिवस मनाउन सुरु गरेको छ ।

विद्यालय प्राङ्गणमा आजदेखि सुरु भएको तीन दिने विशेष कार्यक्रमको पहिलो दिन साना विद्यार्थीहरूले आफ्नो प्रतिभा प्रदर्शन गरे । प्ले–ग्रुपदेखि युकेजीसम्मका विद्यार्थीहरूले गीत, नृत्य तथा विभिन्न सिर्जनात्मक प्रस्तुतिमार्फत अभिभावक र अतिथिहरूलाई दिनभर मनोरञ्जन प्रदान गरे ।

Advertisement

विद्यालय व्यवस्थापन समितिका अध्यक्ष निलम ढुंगानाको सभापतित्वमा भएको कार्यक्रममा प्रिन्सिपल अर्जुन बस्नेतले सिद्धार्थलाई गुणस्तरीय शिक्षाका क्षेत्रमा कोशी प्रदेशकै उत्कृष्ट बनाउने लक्ष्य रहेको बताए ।

उनले विद्यार्थीहरूको सर्वाङ्गिण विकासका लागि संस्कार र प्रविधिलाई मुख्य प्राथमिकतामा राखेको उल्लेख गर्दै शैक्षिक गुणस्तरमा कुनै सम्झौता नगरिने प्रतिबद्धता जनाए । कार्यक्रमको तालिका अनुसार शनिबार कक्षा १ देखि ५ सम्म र आइतबार कक्षा ६ देखि १२ सम्मका विद्यार्थीहरूले आ–आफ्नो प्रतिभा प्रस्तुत गर्नेछन् ।

यसै अवसरमा विद्यालयका पूर्व विद्यार्थी राकेश श्रेष्ठले ३ लाख रुपैयाँको अक्षयकोष स्थापना गरेका छन् । उक्त कोषबाट यस वर्ष विभिन्न क्रियाकलापमा उत्कृष्ट हुने चार जना विद्यार्थीलाई जनही ४ हजार रुपैयाँ नगद र प्रमाणपत्र प्रदान गरियो ।

पुरस्कृत हुनेहरूमा कक्षा १० का अभिज्ञा आचार्य र आरुष पौडेल तथा कक्षा १२ का साहिल राई र रियाना बस्नेत रहेका छन् । उनीहरूलाई प्रिन्सिपल अर्जुन बस्नेत र राकेशका बुबा गोविन्द श्रेष्ठले पुरस्कार वितरण गरे ।