
काठमाडौं। मध्यपूर्वमा बढ्दो तनावका बीच कतारको दोहास्थित नेपाली राजदूतावासले स्वदेश फर्कन चाहने नेपालीहरूका लागि विशेष सूचना जारी गरेको छ । दूतावासले शनिबार एक विज्ञप्ति जारी गर्दै साउदी अरेबियाको बाटो हुँदै नेपाल जान चाहनेहरूलाई आवश्यक प्रक्रिया सुरु गर्न आग्रह गरेको हो ।
दूतावासका अनुसार साउदी अरेबियाका विमानस्थलहरू प्रयोग गरी नेपाल फर्कन चाहने कतार आईडी भएका नेपाली नागरिकले ‘ताशिर साउदी भिसा सेवा केन्द्र’ मार्फत पर्यटक भिसाका लागि आवेदन दिन सक्नेछन् । पछिल्लो समय यस क्षेत्रमा विकास भएका राजनीतिक घटनाक्रम र सुरक्षा संवेदनशीलतालाई ध्यानमा राख्दै दूतावासले यस्तो व्यवस्था गरेको हो ।
यस प्रक्रियाका बारेमा थप जानकारी वा सहयोग आवश्यक परेमा दूतावासले उपलब्ध गराएको मोबाइल नम्बर ५०६६०६२२ मा सम्पर्क गर्न सकिने जनाइएको छ । दूतावासले त्यहाँ रहेका नेपालीहरूलाई स्थानीय सुरक्षा निर्देशनहरूको पालना गर्न र आवश्यक परेमा तुरुन्त सम्पर्कमा रहन समेत अपिल गरेको छ ।
























