
काठमाडौं । नेपालमा अहिले पश्चिमी न्यून चापीय प्रणालीसँगै स्थानीय वायुको आंशिक प्रभाव कायम रहँदा देशका विभिन्न भू–भागमा मौसम बदलीको अवस्था देखिएको छ ।
मौसम पूर्वानुमान महाशाखाका अनुसार यस प्रणालीका कारण शुक्रबार बिहानैदेखि पहाडी र हिमाली क्षेत्रमा बादल लागेको छ भने तराईका अधिकांश क्षेत्रमा आंशिक बदलीदेखि सामान्यतया सफा मौसम रहेको छ । शुक्रबार दिउँसो कोशी, बागमती र गण्डकी प्रदेशका हिमाली भू–भागमा सामान्य बदली रहनेछ ।
कोशी प्रदेशका पहाडी तथा केही तराई क्षेत्रसहित अन्य पहाडी भू–भागमा पनि आंशिक बदली रहने सम्भावना छ । यसैबीच, कोशी प्रदेशका पहाडी र हिमाली भू–भाग तथा बागमती र गण्डकी प्रदेशका हिमाली क्षेत्रका एक–दुई स्थानमा हल्का वर्षा तथा हिमपात हुन सक्ने पूर्वानुमान गरिएको छ ।
त्यसैगरी, लुम्बिनी र सुदूरपश्चिम प्रदेशका तराई क्षेत्रका केही स्थानमा हावाहुरी चल्ने सम्भावना छ । मौसमविद्हरूका अनुसार हावाहुरी क्षणिक भए पनि स्थानीय जनजीवनमा सामान्य असर पार्न सक्ने भएकाले सतर्कता अपनाउन सुझाव दिइएको छ ।
रातिको समयमा पनि कोशी प्रदेशका पहाडी तथा हिमाली भू–भागमा बदली कायमै रहनेछ भने बागमती, गण्डकी र कर्णाली प्रदेशका हिमाली क्षेत्रमा आंशिक बदली रहने अनुमान छ । कोशी र गण्डकी प्रदेशका उच्च हिमाली क्षेत्रका एक–दुई स्थानमा हल्का वर्षा र हिमपातको सम्भावना रहेको महाशाखाले जनाएको छ ।
मौसम प्रणालीको प्रभाव अझै केही दिन कायम रहन सक्ने भएकाले विशेषगरी हिमाली तथा पहाडी क्षेत्रमा यात्रा गर्ने र कृषि कार्यमा संलग्न व्यक्तिहरूलाई आवश्यक सतर्कता अपनाउन आग्रह गरिएको महाशाखाले जनाएको छ ।
























