विषालु राजगोमनको उद्धार

Share this
705shares
मुलुकी खबर
मुलुकी खबर
clock२०८२ चैत २८, शनिबार १९:५७

धनकुटा । धनकुटा नगरपालिका–३ र ६ को सिमाना पर्ने कागतेमा गोठभित्र लुकेको अवस्थामा करिब १३ फिट लामो विषालु सर्प राजगोमन सर्पको उद्धार गरिएको छ ।

बोधप्रसाद वाग्लेको गोठमा तीन दिनदेखि बसिरहेको उक्त सर्पलाई उद्धारकर्ता प्रदीप श्रेष्ठले नियन्त्रणमा लिएका हुन् । महालक्ष्मी नगरपालिका–५, लेगुवाका श्रेष्ठले सर्पलाई सुरक्षित रूपमा नियन्त्रणमा लिएर जोखिममुक्त बनाएका थिए ।

समुद्री सतहबाट करिब १,३०० मिटर उचाइमा रहेको पहाडी क्षेत्रमा यति ठूलो र विषालु सर्प भेटिनु दुर्लभ घटना मानिएको छ । उद्धारकर्ता श्रेष्ठका अनुसार राजगोमन अत्यन्तै विषालु सर्प हो । जसको टोकाइले ज्यानै जान सक्ने खतरा हुन्छ । उनका अनुसार नचलाएसम्म यसले आक्रमण गर्दैन । तर, छोएमा, चलाएमा र उसलाई असर पुग्ने काम गरेमा उत्तेजित भएर अत्यन्त आक्रामक बन्छ ।

उद्धार गरिएको सर्पलाई डिभिजन वन कार्यालयसँग समन्वय गरेर सुरक्षित वन क्षेत्रमा छोड्ने तयारी भइरहेको धनकुटा नगरपालिका–३ का वडाध्यक्ष विकास घिमिरेले जानकारी दिएका छन् । श्रेष्ठ विगत ९ वर्षदेखि सर्प उद्धार कार्यमा सक्रिय रहँदै आएका छन् । उनका अनुसार पछिल्लो समय धनकुटा, महालक्ष्मी र पाख्रीबास क्षेत्रबाट समेत राजगोमन भेटिने क्रम बढेको छ ।

उनले पछिल्ला वर्षहरूमा पाँचवटा यस्ता सर्प उद्धार गरेर सुरक्षित रूपमा जंगलमा छोडिसकेको बताएका छन् । श्रेष्ठका अनुसार जलवायु परिवर्तन, बासस्थानको परिवर्तन तथा मानव बस्ती विस्तारका कारण यस्ता विषालु सर्पहरू पहाडी क्षेत्रमा देखिन थालेका हुन् । यस्ता सर्प पहिले तराई र घना वन क्षेत्रमा मात्र सीमित थिए ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.